Elimizde Ozon, Wildberries marketpleısteriniń ortalyǵy salynady

<p>ASTANA. KAZINFORM &ndash; Saýda jáne ıntegratsııa mınıstri Arman Shaqqalıev elimizde elektrondyq saýda ınfraqurylymynyń damý barysy týraly aıtyp berdi.</p>

- Elektrondyq saýda ınfraqurylymy damyp jatyr. Búginde menshikti ınfraqurylymy 100 myń sharshy metr bolatyn Teez jańa qazaqstandyq marketpleıs iske qosyldy, jaqyn arada 10 myń jumys orny qurylady. Bul jobaǵa 50 mıllıon AQSh dollary kóleminde ınvestıtsııa quıyldy. Sondaı-aq, bıyl Ozon jáne Wildberries marketpleıster Astana jáne Almaty qalalarynda ınvestıtsııa kólemi 101,3 mıllıard teńge bolatyn jalpy aýdany 291 myń sharshy metr 3 ortalyq salý josparlanyp otyr, - dedi Arman Shaqqalıev Úkimet otyrysynda.

Mınıstrdiń málimdeýinshe, transshekaralyq elektrondyq saýdany yntalandyrý maqsatynda byltyr Bishkekte Túrki memleketteriniń uıymy sheńberinde úkimetaralyq kelisimge qol qoıyldy.

- Elektrondyq saýda salasynda halyqaralyq qujattardy ázirleý boıynsha jumys júrgizilip jatyr. Onyń ishinde Dúnıejúzilik saýda uıymy, Eýrazııalyq ekonomıkalyq odaq, Shanhaı yntymaqtastyq jáne Ortalyq Azııa elderi arasynda, - deıdi ol.

Eske sala keteıik, sońǵy eki jylda elektrondy saýdadaǵy shaǵymdar 290%-ǵa ósken. Qazir Májilis jańa zań redaktsııasyn qarap jatyr.