Elimizde ótetin Dúnıejúzilik kóshpendiler oıyndaryna 100-den asa eldiń sportshylary qatysady

<p>ASTANA. KAZINFORM &ndash; Astanada V Dúnıejúzilik kóshpendiler oıyndaryn ótkizýge belsendi daıyndyq júrgizilip jatyr. Jyldyń basty oqıǵalarynyń biri qyrkúıek aıynda ótedi.</p>

Astana qalasy ákimdigi baspasóz qyzmetiniń málimetinshe, 8-14 qyrkúıek aralyǵynda ótetin kóshpendiler oıyndaryna júzden asa eldiń tórt myńǵa jýyq ókili qatysady dep josparlanǵan. Qazirdiń ózinde bul aýqymdy is-sharaǵa 107 memleket qyzyǵýshylyq tanytqan.

Oıyndar 3 negizgi baǵyttan turady: sport, mádenıet, ǵylym. Máselen, sporttyń 20 túrinen 110 medal sarapqa salynady. Sporttyq baǵdarlamada ulttyq at sporty, ulttyq kúres túrleri, dástúrli sadaq atý, ań aýlaıtyn qustarmen ań aýlaý jáne zııatkerlik sport túrleri boıynsha jarystar ótkiziledi. Sondaı-aq kórme baǵdarlamasyna 10 túrli etnıkalyq sport túri kiredi.

Sporttyq baǵdarlamanyń nysandary syzyqtyq júıe boıynsha bir-birine óte jaqyn ornalasqan.

Qatysýshylardy qonaq úıden jarys ornyna deıin yńǵaıly tasymaldaý pysyqtaldy.

Oıyndardy ótkizý úshin elordanyń 6 negizgi sporttyq ınfraqurylymy bekitildi: «Astana-Arena» stadıony, J.Úshkempirov atyndaǵy jekpe-jek saraıy, «Alaý» muz aıdyny saraıy, «Qazaqstan» jeńil atletıka sport kesheni, «Dýman» qonaq úı kesheni, «Qazanat» ıppodromy.

Mádenı baǵdarlamanyń negizgi alańy «Qazanat» ıppodromyna irgeles «Kóshpendiler álemi» etnoaýyly bolmaq.

Ulttyq mýzeıde etnosportty damytýdyń túrli aspektileri zertteletin halyqaralyq ǵylymı-praktıkalyq konferentsııa ótedi.

Oıyndardy uıymdastyrýǵa 1000-ǵa jýyq erikti qatysady. Volonter bolýǵa 18 jastan asqan kez kelgen astanalyqtyń múmkindigi bar.