Elimizde orman órtin erte anyqtaıtyn júıe engizilip jatyr

<p>ASTANA. KAZINFORM &ndash; Qazaqstanda orman órtin erte anyqtaý avtomattandyrylǵan júıesi engizilip jatyr. Bul týraly QR Ekologııa jáne tabıǵı resýrstar vıtse-mınıstri Nurlan Qurmalaev aıtty.</p>

— Júıe orman alqaptaryn úzdiksiz baqylaýdy qamtamasyz etedi. Arnaıy optıkalyq datchıkter men derekterdi taldaý algorıtmderi ártúrli jaǵdaılarda, sonyń ishinde taýlar men dalada, tipti uzaq qashyqtyqta da órtti avtomatty túrde anyqtaıdy. Júıege jasandy ıntellekt biriktirilgen, ol derekterdi tirkep, birden aqparat ortalyǵyna jiberedi. Júıe engizilgen ýchaskelerde beınekameralar, derekterdi berýge arnalǵan antennalar, sondaı-aq derekterdi óńdeý jáne elektrmen jabdyqtaý júıesi ornatylǵan, - dedi ol OKQ alańynda.

Vıtse-mınıstr atap ótkendeı, júıe «Ertis Ormany» tabıǵı rezervatynda jáne «Kókshetaý» ulttyq parkinde iske qosyldy. Osyǵan uqsas júıeler «Medeý» óńirlik parkinde, «Býrabaı» ulttyq parkinde, Qostanaı, Batys Qazaqstan jáne Soltústik Qazaqstan oblystarynyń orman mekemelerinde engizildi. 

— Órt shyǵý qaýpi basym orman sharýashylyqtary anyqtaldy, onda QR TJM Komandalyq ortalyǵyna qosa otyryp, júıeni kezeń-kezeńimen masshtabtaý josparlanýda. Sondaı-aq zań buzýshylyqtardyń aldyn alý jáne adamdardyń kelip-ketýin saraptaý úshin Іle-Alataý, Sharyn, Saıram-Ógem, Baıanaýyl, Kólsaı kólderi memlekettik ulttyq tabıǵı parkteriniń aýmaǵyndaǵy baqylaý-ótkizý pýnktteri avtomattandyryldy, - dedi vıtse-mınıstr Nurlan Qurmalaev.

Elimizde Qorshaǵan orta men tabıǵı resýrstardyń jaı-kúıi jónindegi Ulttyq derekter banki quryldy. 

Odan bólek, bıyl 5 myńǵa jýyq zańsyz qoqys oryndary anyqtaldy.