Elimizde nashar kóretin adamdarǵa arnalǵan kitaptardyń sany artady - mınıstrlik

<p>ASTANA. KAZINFORM &mdash; QR Mádenıet jáne aqparat vıtse-mınıstri Evgenıı Kochetov nashar kóretin adamdarǵa arnalǵan kitaphanalardyń sanyn arttyrýǵa qatysty túsinik berdi.</p>

- Qazirgi kezde nashar kóretin adamdarǵa arnalǵan kitaphanalar jelisinde 17 nysan qamtylǵan. Onyń bireýi respýblıkalyq, jeteýi oblystyq jáne qalalyq deńgeıdegi kitaphanalar bar, sondaı-aq 142 kitaphana pýnkti jumys istep tur. Bul kórsetkish jyl saıyn artyp keledi. Sonymen qatar, Marrakesh sharty atalǵan kitaphanalar sanyn kóbeıtýge yqpal etedi, - dedi 
E. Kochetov senatorlardyń suraǵyna jaýap bere otyryp.

Onyń aıtýynsha, bul kitaphanalarda 43 Braıl prınteri, 39 Braıl dıspleıi jáne birneshe arnaıy topografııalyq qurylǵylar bar.

- Marrakesh sharty aıasynda osy kitaphanalardaǵy kitap qorynyń artýy josparlanǵan. Qazir bizdegi qorda 1 mln qamtylǵan, onyń arasynda Braıl qarpimen jazylǵan 198 myń kitap bar. Jyl saıyn osy sanattaǵy kitaptar artyp keledi. Sondaı-aq, kórý qabileti nashar jandarǵa arnalǵan mamandandyrylǵan kitaphanamyz byltyrdyń sońynda Almatyda jańa ǵımaratqa ıe bolǵanyn habarlaımyn. Endi ol 3500 sharshy metr aýmaqta qyzmet etedi. Onda kórý jáne estý qabileti nashar adamdardyń jumysyna arnalǵan Braıl shrıftimen ádebıetterdi basyp shyǵarýǵa arnalǵan mamandandyrylǵan baspahanalardy ashqymyz keledi, - dep túsindirdi vıtse-mınıstr.

Aıta keteıik, búgin Senattyń jalpy otyrysynda «Zaǵıptardyń jáne kórý qabileti buzylǵan nemese baspa aqparatyn qabyldaý qabileti ózgedeı shektelgen adamdardyń jarııa etilgen týyndylarǵa qol jetkizýin jeńildetý týraly Marrakesh shartyn ratıfıkatsııalaý týraly» Zańy maquldandy.

2024 jyldyń aıaǵynda Almaty kitaphanalaryna Braıl dıspleıleri ornatylǵanyn jazǵan edik.