Elimizde klınıkalyq zertteýler úshin eriktiler pýly qurylady
«Qazaqstannyń zańnamalyq bazasynda klınıkalyq zertteýler júrgizý úshin qajetti ruqsat berý sharalary bar ekenine qaramastan, klınıkalyq zertteýler protsesin ońtaılandyrý úshin ulttyq normatıvtik-quqyqtyq aktilerdi EAEO (Eýrazııa ekonomıkalyq odaq) retteýshi qujattarymen úılestirý talap etiledi. Joǵary sapaly, etıkalyq jáne ınnovatsııalyq klınıkalyq zertteýlerdi usyna otyryp, patsıentterdiń densaýlyq saqtaýdyń ozyq tehnologııalaryna qoljetimdiligin qamtamasyz etý úshin medıtsına ǵylymy men praktıkasyn jetildirýge baǵyttalǵan Qazaqstan Respýblıkasynda klınıkalyq zertteýlerdi damytýdyń 2025-2027 jyldarǵa arnalǵan ulttyq strategııasy ázirlenip jatyr. Bul strategııa múddeli taraptarmen ashyq alańdarda talqylanady», - delingen mınıstrliktiń redaktsııa joldaǵan resmı saýal jaýabynda.
Ulttyq strategııany iske asyrý merzimi – 2024 jyldyń úshinshi toqsany.
Maqsat – densaýlyq saqtaý salasyndaǵy zertteýlerdiń básekege qabiletti ekojúıesin damytýǵa yqpal etýge arnalǵan otandyq bıomedıtsınalyq zertteýlerdi ilgeriletý úshin ǵylymı aqparattyq alańǵa aınalatyn, ulttyq ǵylymı platformany ázirleý boıynsha is-sharalar júrgizý. Platformada elimizde klınıkalyq zertteýlerdi tıimdi basqarý maqsatynda qurylǵan 4 tizilim ornalastyrylady:
– Klınıkalyq zertteýler tizilimi ǵylymı zertteýlerdi basqarý protsesin ońtaılandyrýǵa múmkindik beredi;
– Zertteýshiler tizilimi el aýmaǵynda klınıkalyq zertteýlerdi iske asyratyn qazaqstandyq zertteýshiler boıynsha derekterdi qamtıdy. Tizilim áleýetti kadrlardy izdeýge jáne Qazaqstannyń klınıkalyq zertteýshiler pýlyn esepke alýǵa arnalǵan;
– Klınıkalyq bazalar tizilimi elimizdegi densaýlyq saqtaý uıymdary boıynsha derekterdi qamtıdy, olardyń negizinde klınıkalyq zertteýler júrgiziledi. Tizilim salanyń zertteýlerdi (ınfraqurylymdy) iske asyrýǵa daıyndyǵyn baǵalaýǵa jáne olardyń áleýetin zerdeleýge, klınıkalyq bazalardy esepke alýǵa múmkindik beredi;
– Eriktiler tizilimi klınıkalyq zertteýlerge qatysý úshin áleýetti eriktiler pýlyn qurýǵa arnalǵan. Zertteýge qatysýǵa nıet bildirgen Qazaqstan Respýblıkasynyń azamaty kandıdatýrasyn osy tizilimge engizýge suraý salyp, ony keıinnen qaıtara alady.
«Zertteýlerge qatysty máseleniń biri júrgizilip jatqan zertteýler men olardyń nátıjeleri týraly egjeı-tegjeıli ári tolyq kólemdi málimetter bazasynyń bolmaýy. Bul jaǵdaı Qazaqstan aýmaǵynda júrgizilgen birqatar bıomedıtsınalyq zertteýdiń osy tizilimnen tys qalýyna alyp keledi. Ulttyq ǵylymı platformany ázirleý boıynsha jumys júrgizilýde, onyń negizgi maqsaty – elimizde bıomedıtsınalyq zertteýlerdi ilgeriletý úshin ǵylymı aqparattyq alańdy qalyptastyrý. Onda tórt tizilim ornalastyrylady, ıaǵnı, klınıkalyq zertteýler, zertteýshiler, klınıkalyq bazalar jáne eriktiler», - deıdi mınıstrlikten.