«988 myń tonna ónim». Elimizde qant qyzylshasyn jınaý naýqany aıaqtaldy

<p>ASTANA. KAZINFORM — Elimizde qant qyzylshasynyń ortasha ónimdiligi gektarynan 535,5 tsentnerdi qurap, shamamen 1,3 mln tonna jınaldy. Bul týraly AShM baspasóz qyzmeti habarlady.</p>

Premer-mınıstrdiń orynbasary Serik Jumanǵarınniń tóraǵalyǵymen ótken keńeste qant qyzylshasyn jınaý nátıjeleri qarastyryldy.

20 jeltoqsandaǵy jaǵdaı boıynsha qazaqstandyq qant zaýyttary óńdeýge 988,6 myń tonna ónim qabyldady: «Aqsý qant» zaýyty — 351,7 myń tonna (onyń ishinde Jambyl oblysynan — 39,3 myń tonna); Kóksý qant zaýyty — 252,6 myń tonna; Merki qant zaýyty — 384,3 myń tonna. Qalǵan ónim óńdeýge deıin fermerlerdiń qant qyzylshasy úıindilerinde saqtaýly.

Jalpy ónimniń jartysy — 640 myń tonna Jambyl oblysynda jınaldy. Bul aımaqta qant qyzylshasyn tek Merki qant zaýyty óńdeıdi. Qoldanystaǵy qýattylyqtarǵa sáıkes, Merki zaýyty 450 myń tonna, Jetisý oblysyndaǵy Aqsý zaýyty 100 myń tonna qabyldaıdy, al qalǵan 90 myń tonna qant qyzylshasy Qyrǵyzstannyń qant zaýyttaryna jóneltiledi.

Mundaı sheshim jınalǵan ónimniń barlyǵyn tolyq óńdeýdi qamtamasyz etý maqsatynda qabyldandy. Qazaqstan men Qyrǵyzstan úkimetteri arasynda qant qyzylshasyn úzdiksiz qabyldaý, óńdeý jáne daıyn qantty keri jetkizý boıynsha kelisimder bekitilgen.

Sonymen qatar, fermerlerge qant qyzylshasyn qaı zaýytqa tapsyrǵanyna qaramastan, qoldanystaǵy tártip boıynsha ákimdikter men qant zaýyttary tarapynan sýbsıdııalar tólenedi.

Eske salsaq, budan buryn Aýyl sharýashylyǵy mınıstri Aıdarbek Saparov aýyl sharýashylyǵy qyzmetkerleriniń birinshi forýmynda eldiń qant qyzylshasyna degen suranysy tolyqtaı otandyq ónimmen qamtamasyz etilgenin aıtty.