Elimizde qandaı azyq-túlik ımportqa táýeldi

<p>ASTANA. KAZINFORM &ndash;&nbsp; Aýyl sharýashylyǵy mınıstrligi elimizdi otandyq ónimmen tolyqtaı qamtýǵa, ımportqa táýeldilik deńgeıine qatysty túsinik berdi.</p>

«Áleýmettik mańyzy bar azyq-túlik taýarlarynyń 19 túrin qosa alǵanda, azyq-túlik taýarlarynyń negizgi túri (29 túri) boıynsha ishki naryqtyń otandyq óndiris esebinen qamtamasyz etilýi 80 jáne odan da kóp paıyzǵa jetti. Onyń ishinde 11 taýar pozıtsııasy boıynsha ishki naryq 100% jáne odan da kóp (nan, makaron, kartop, kúrish, qoı eti, taýyq jumyrtqasy, bıdaı uny, qaraqumyq jarmasy, tuz, kúnbaǵys maıy, sıyr eti) qamtamasyz etilgen. 12 azyq-túlik taýary boıynsha qamtamasyz etilý 80% jáne odan da kóp (sút, qyzanaq, qııar, sábiz, qyryqqabat, pııaz, burysh, qyzylsha, jylqy eti, sút ónimderi, maı)», - delingen Aýyl sharýashylyǵy mınıstrliginiń Kazinform agenttigine bergen jaýabynda.

Jekelegen taýarlar boıynsha ishki tutynýdaǵy otandyq óndiristiń úlesi áli de az deńgeıde qalyp otyr. Atap aıtqanda, qus eti (67%), shujyq ónimderi (61,1%), irimshik pen súzbe (55%), qant (50,3%), balyq (74,5%). Atalǵan taýar pozıtsııalary boıynsha mınıstrlik óndiris kólemin ulǵaıtý jáne ımportty almastyrý boıynsha júıeli jumysty jalǵastyryp jatyr. 

«2023 jyly 43,8 myń tonna irimshik pen súzbe óndirildi. Bul 2022 jylmen salystyrǵanda 10,3 paıyzǵa artyq. 2023 jyly 11 aıda ımport 32,2 myń tonna (2022 j. 11 aı – 31,5 myń tonna), eksport – 2,9 myń tonna (2022 j. 11 aı – 2,5 myń tonna) boldy. Іrimshik pen súzbeni óndirýdi ulǵaıtý jónindegi sharalar aıasynda 2023 jyly 26,6 mlrd teńge somaǵa 8 650 iri qara mal basyna sút-taýar fermalary boıynsha 21 joba paıdalanýǵa berildi. Sút óńdeýshi kásiporyndardy sapaly shıkizatpen qamtamasyz etý úshin aýyl sharýashylyǵy taýaryn óndirýshilerdi qaıta óńdeýshi kásiporyndarǵa tapsyrylǵan sút kólemine sýbsıdııalaý, sondaı-aq qaıta óńdeýshi kásiporyndardyń ózin tereń óńdeýge arnalǵan shıkizatty satyp alýǵa sýbsıdııalaý júzege asyrylady», - dep atalyp ótken vedomstvo aqparatynda.

2023 jyly 328,6 myń tonna qus eti óndirildi. Bul onyń aldyndaǵy jyldyń sáıkes kezeńimen salystyrǵanda 13,8 paıyzǵa artyq (2022 j. - 288,7 myń tonna).

Budan bólek, 2023 jyldyń 11 aıynda qus eti ımportynyń kólemi 132,8 myń tonnaǵa jetti (2022 j. 11 aı – 130,2 myń tonna). Bul rette, kórsetilgen kezeńde eksport 28,3 myń tonna boldy. Bul 2022 jyldyń uqsas kezeńiniń deńgeıinen 2 ese kóp (2022 j. 11 aı – 13,1 myń tonna).

Qazir qus eti boıynsha ımportqa táýeldilikti azaıtý úshin 89 mlrd teńge somasyna 5 joba paıdalanýǵa berildi.

Foto: Kazinform