Elimizde ınklıýzıvti bilim berýdiń ulttyq modeli engiziledi

<p>ASTANA. KAZINFORM - Búginde elimizdegi mektepterdiń 86% - dan astamynda ınklıýzıvti bilim alý múmkindikteri qarastyrylǵan. Bul týraly BUU-nyń Jenevadaǵy Múgedekterdiń quqyqtary týraly Konventsııada QR Oqý-aǵartý vıtse-mınıstri Edil Ospan málimdedi, dep habarlaıdy mınıstrliktiń baspasóz qyzmeti. &nbsp;</p>

Ol óz sózinde, ınklıýzıvti oqytý bilim salasyn damytýdyń negizgi qurylymy retinde tanylǵanyn atap ótti. Qazaqstan Úkimeti erekshe bilim berý qajettilikteri bar balalardy oqytýdyń qoljetimdiligin qamtamasyz etý jáne bilim sapasyn arttyrý boıynsha keshendi jumystar júrgizip jatyr.

«Inklıýzıvti bilim berýdi damytý jóninde strategııalar men baǵdarlamalar ázirlendi. Aldaǵy ýaqytta pedagogter úshin oqytý semınarlary men trenıngter uıymdastyrylyp, mektepter men oqý oryndarynyń bastamalary qoldaý tabady. Arnaıy bilim berý uıymdarynyń jelisi 68 birlikke ulǵaıdy.

Mektepter bazasynda ınklıýzııany qoldaýdyń 708 kabıneti, 22 resýrstyq konsýltatıvtik ortalyq ashyldy. Oqý mekemelerine 2,5 myńǵa jýyq pedagog-assıstent, 9,7 myń arnaıy pedagog, 12 myńnan astam pedagog-psıholog jáne áleýmettik pedagogter jumysqa qabyldandy. 600-den astam arnaıy oqý baǵdarlamalary ázirlendi. Kedergisiz jáne ınklıýzıvti ortany qalyptastyrý úshin oqý oryndarynda ınklıýzıvti bilim berýdiń úzdiksiz júıesiniń ulttyq modeli engiziletin bolady», - dedi Edil Ospan.

Qazir Qazaqstanda erekshe bilim berý qajettilikteri bar 200 myńnan astam bala bar. Olar úshin arnaıy bilim berý uıymdarynyń jelisi qurylǵan. Atap aıtqanda, 44 arnaıy balabaqsha, 99 arnaıy mektep, 99 PMPK, 212 PPTK, 10 aýtızm ortalyǵy jáne 13 ońaltý ortalyǵy bar. Al qalǵan balalar ınklıýzııa jaǵdaıynda jalpy bilim beretin mektepterde oqıdy. 2023 jyly qarashada Oqý-aǵartý mınıstrliginiń janynan bilim berýdiń barlyq deńgeıinde jalpy saıasatty iske asyrý maqsatynda Arnaıy jáne ınklıýzıvti bilim berý departamenti quryldy.