Elimizde dári-dármek baǵasy qanshalyqty ózgerdi

<p>ASTANA. KAZINFORM &ndash; QR Densaýlyq saqtaý mınıstrliginiń Sanıtarııalyq-epıdemıologııalyq baqylaý komıteti dári baǵasyn zańsyz kóterip saýdalaǵan dárihanalar anyqtalǵanyn málim etti.</p>

«2023 jylmen salystyrǵanda, qazirgi kezde dárilik zattarǵa baǵanyń ósýi baıqaldy (13%), biraq ýákiletti organ bekitken shekti baǵadan aspady. Keıbir dárilik zattarǵa baǵanyń maýsymdyq ósýi anyqtalǵan. Dárilik zattar baǵasynyń ósýi shıkizat, tasymaldaý qunynyń ósýine jáne ınflıatsııaǵa tikeleı táýeldi. Degenmen keıbir dárilik zattarǵa baǵanyń tómendegenin aıta ketý kerek», - delingen mınıstrliktiń Kazinform agenttigine bergen jaýabynda.

«Halyq densaýlyǵy jáne densaýlyq saqtaý júıesi týraly» Kodeksine sáıkes, ýákiletti organ jylyna 2 ret bólshek jáne kóterme saýdada ótkizýge arnalǵan dárilik zattyń saýdalyq ataýyna shekti baǵany bekitedi. Qazir QR Densaýlyq saqtaý mınıstriniń 2023 jylǵy 7 tamyzdaǵy № 465 buıryǵymen 6890 dárilik zattyń saýdalyq ataýyna shekti baǵa qoıyldy. QR Ákimshilik quqyq buzýshylyq týraly kodeksiniń 426-babyna sáıkes, dári-dármekti bekitilgen shekti baǵadan asyra satqany úshin jaýapkershilik kózdelgen.

«Kóterme-bólshek saýda jelisinde 2024 jyldyń basynan beri dári-dármekti shekti baǵadan asyra satý boıynsha 12 fakti anyqtaldy, 2,1 mln teńge somasynda aıyppul salyndy. Sonymen qatar shekti baǵadan asyra satý faktisi anyqtalǵan jaǵdaıda, Medıtsınalyq jáne farmatsevtıkalyq baqylaý komıtetiniń aýmaqtyq departamentterine dáleldi qujattarmen (dári-dármek jáne satý túbirtegimen) nemese DARIKZ mobıldi qosymshasy arqyly ótinish qaldyrýǵa bolady», - dep atalyp ótken vedomstvo aqparatynda.

Budan buryn habarlanǵandaı, birinshi jartyjyldyqtyń qorytyndysy boıynsha Qazaqstanda 87,3 mlrd teńgeniń dárilik zattary óndirildi, bul 2023 jyldyń birinshi jartyjyldyǵymen salystyrǵanda 20,1%-ǵa artyq. 

QR Densaýlyq saqtaý mınıstrligi Azamattarǵa dári-dármektiń shekti bólshek saýda baǵasyn baqylaý úshin Dari.kz mobıldik qosymshasyn paıdalanýdy usyndy.