Elimizde bıdaı jáne sýdy kóp qajet etetin daqyldar alqaby azaıady
«2023 jyly egis naýqany sapaly tuqymdardy paıdalaný arqyly ońtaıly merzimde júrgizildi. Aýyl sharýashylyǵy taýaryn óndirýshiler tyńaıtqyshtardy ýaqytyly engizip, aýyl sharýashylyǵy daqyldaryn aramshópter men aýrýlarǵa qarsy hımııalyq óńdeýdi der kezinde júrgizdi. Sonymen qatar, byltyr klımat pen ósimdik aýrýlarynyń saldarynan egin shyǵymdylyǵyna teris áser etti. Qazaqstandaǵy qurǵaqshylyq máselesi ótkir másele bolyp qalyp otyr. Jambyl oblysynda qurǵaqshylyq saldarynan 6,3 myń gektar qant qyzylshasy egistigi joıyldy. Aımaqta tótenshe jaǵdaı jarııalandy. Egin jınaýdyń basynda sharýalar jaýyn-shashynnyń kóp bolýyna baılanysty qıyndyqtarǵa tap boldy, bul astyq jınaý qarqyny men astyqtyń sapasyna áser etti. Jyl sońynda barlyǵy 17,1 mıllıon tonna dándi daqyldar bastyryldy, onyń ishinde 12,1 mıllıon tonnasy bıdaı. Statıstıkalyq málimetterge sáıkes, 3 mln tonnaǵa jýyq aýyspaly kólemder de bar», - delingen Aýyl sharýashylyǵy mınıstrliginiń Kazinform agenttigine bergen jaýabynda.
Bul turǵyda ishki tutynýdy eskere otyryp, jınalǵan ónim ishki naryqqa qajet mólsherdi qamtamasyz etýge jáne belgili bir kólemde eksportqa jóneltýge jetkilikti bolady.
«Mınıstrlik salanyń ósýiniń negizgi faktorlaryn anyqtady. Sonyń biri – sýarmaly eginshilikti damytý. Qazir aýyl sharýashylyǵy sýmen qamtamasyz etýdiń negizgi problemalaryna tap bolyp otyr. Sýarmaly eginshiliktiń tıimdiligin arttyrý perspektıvalary sýdy únemdeıtin sýarý tehnologııalaryn keńinen qoldanýmen tyǵyz baılanysty. Bul óz kezeginde sýdy paıdalanýdy azaıtýǵa, sýmen jáne qorektik zattarmen maqsatty qamtamasyz etý arqyly ónimdilikti arttyrýǵa múmkindik beredi. Osyǵan baılanysty taýar óndirýshilerdi sýdy únemdeý tehnologııalaryn engizýge yntalandyrý maqsatynda mınıstrlik jaǵynan ınvestıtsııalyq sýbsıdııalaý, sondaı-aq fermerlerge sý berý qyzmetteriniń qunyn sýbsıdııalaý túrinde memlekettik qoldaý sharalary kórsetiledi», - dep atalyp ótken mınıstrlik aqparatynda.
Qazir negizgi mindet – kóktemgi egin egý jumystaryn ońtaıly merzimde júrgizý.
«Bul úshin mınıstrlik óńirlerge bıdaı men sýdy kóp qajet etetin daqyldardyń (kúrish 6 myń gektarǵa, maqta 16 myń gektarǵa) alqabyn qysqartýdy jáne balamaly joǵary rentabeldi daqyldardy (maıly, kókónis-baqsha, jem-shóp jáne t.b.) keńeıtýdi kózdeıtin egistik alqaptarynyń qurylymyn ártaraptandyrý jónindegi ındıkatıvterdi taratty», - delingen mınıstrlik málimetinde.