Elimizde arhıv salasy túgeldeı tsıfrlandyrylady

<p>TÚRKІSTAN. KAZINFORM &ndash; Búgin Túrkistanǵa Qazaqstan Respýblıkasy Mádenıet jáne aqparat vıtse-mınıstri Erbol Álıqulov jumys saparymen keldi. Óńir turǵyndarymen kezdesken vıtse-mınıstr salada atqarylyp jatqan jumystarmen tanystyrdy.</p>

Erbol Álıqulov aldaǵy ýaqytta «Kınematografııa týraly» zańǵa ózgerister engizý josparlanyp otyrǵanyn jetkizdi. Onyń ishinde Sh.Aımanov atyndaǵy «Qazaqfılm» kınostýdııasyna memlekettik qoldaý kórsetý boıynsha jumys bastalady.

«Qazaqfılm qatardaǵy kınostýdııa emes, bul bizdiń tarıhymyz, bizdiń rýhymyz, ulttyq kınomyzdyń keleshekke degen úkili úmiti. Sondyqtan da ony saqtap qana qoımaı, qaryshtap damýyn qamtamasyz etetin bolamyz.

Sonymen qatar, arhıv salasyn da túgeldeı tsıfrlandyrý jumysy júrgiziletin bolady. Mýzeı-qoryqtardyń marshrýtyn ulttyq mádenı-rýhanı mazmunmen kúsheıtý kózdelýde. Kreatıvti ındýstrııany qoldaý sharalary paketi de ázirlenip jatyr. Otandyq ádebıetti qoldaý jáne ulttyq mádenıetti shetelde nasıhattaý máselesi de nazardan tys qalmaıdy», - dedi Erbol Shymkentbaıuly.

Foto: Túrkistan oblysy ákimdigi

Memleket basshysynyń jarlyǵymen otandyq aqparattyq kontenttiń básekege qabilettiligi men sapasyn arttyrý, onyń qundylyǵyn tolyqtyrý, aqparattyq qaýipsizdikti qamtamasyz etýge baǵyttalǵan Aqparattyq doktrına bekitilgen.

«Mass-medıa» týraly zań aıasynda jýrnalısterdiń mártebesi artyp, memlekettik aqparattyq saıasat jetile túspek. «Onlaın-platforma jáne onlaın-jarnama» týraly zańynyń talaptaryna sáıkes, jalǵan aqparatty taratýǵa qatysty jaýapkershilik kózdelgen.

- «Mádenıet týraly» zańǵa kezeń-kezeńimen ózgerister men tolyqtyrýlar engizý – bul ýaqyt talaby. Sonymen birge, qoǵam kóterip júrgen basqa da ózekti dúnıeler bar. Onyń ishinde – mádenıet qyzmetkerleriniń áleýmettik statýsynan bastap, sahnada fonogrammany paıdalaný, avtorlyq quqyq jáne taǵy basqa máseleler kún tártibinde tur. Mádenıet eshqashan saıasattyń quraly, eshqandaı saıası lozýngtar men urandardyń jeteginde bolmaýy tıis. Al bul máseleni biz tek bir rettik sheshimdermen emes, barlyǵyna túsinikti zań sheńberinde retteýimiz kerek», – dedi vıtse-mınıstr.

Kezdesýde túrkistandyqtar túıtkildi máselelerdi ortaǵa saldy. Zaldaǵy azamattar kókeıdegi suraqtaryn qoıyp, usynys-pikirlerin bildirdi. Kezdesýden soń Erbol Álıqulov azamattardy jeke máseleler boıynsha jeke qabyldap, ótinishterin tyńdady. Buqaralyq aqparat quraldary ókilderimen brıfıng ótkizip, saýaldarǵa jaýap berdi.

Vıtse-mınıstr kóterilgen máseleler men usynystar nazarǵa alynyp, ári qaraı jumys jalǵasatynyn jetkizdi.