Elimizde apta ishinde bolǵan kadrlyq taǵaıyndaýlar
Apta basynda QR Densaýlyq saqtaý vıtse-mınıstri qyzmetine Erjan Shákiruly Nurlybaev taǵaıyndaldy.
Erjan Nurlybaev 1975 jyly Temirtaý qalasynda dúnıege kelgen. Qaraǵandy memlekettik medıtsına akademııasyn «Emdeý isi» mamandyǵy boıynsha, Qaztutynýodaǵy Qaraǵandy ekonomıkalyq ýnıversıtetin «Menedjment» mamandyǵy boıynsha bitirgen. Eńbek jolyn 1998 jyly Qaraǵandy №1 qalalyq aýrýhanasynda dáriger-hırýrg bolyp bastaǵan.
2004-2006 jyldary E. Nurlybaev atalǵan medıtsınalyq mekeme dırektorynyń emdeý isi jónindegi orynbasary qyzmetin atqardy. Ár jyldary Qaraǵandy oblysynyń bas hırýrgi bolyp qyzmet istedi, H.J. Maqajanov atyndaǵy oblystyq travmatologııa jáne ortopedııa ortalyǵyn basqardy. 2014-2021 jyldary — Qaraǵandy oblysy Densaýlyq saqtaý basqarmasynyń basshysy, 2021 jyldan bastap «QMÝ» KeAQ Dırektorlar keńesiniń tóraǵasy, qazirgi ýaqytqa deıin Qaraǵandy oblystyq klınıkalyq aýrýhananyń dırektory bolyp jumys istedi.
QR tsıfrlyq damý, ınnovatsııalar jáne aeroǵarysh ónerkásibi mınıstrligi Jasandy ıntellekt jáne ınnovatsııalardy damytý komıtetiniń tóraǵasy qyzmetine Ǵızzat Seıdahmetuly Baıtursynov taǵaıyndaldy.
Ǵızzat Baıtursynov Malaızııanyń Azııa-Tynyq muhıty tehnologııalar jáne ınnovatsııalar ýnıversıtetin jáne D.A.Qonaev atyndaǵy Eýrazııalyq zań akademııasyn bitirgen. Kásibı mansabyn jeke kompanııada baǵdarlamashy bolyp bastaǵan.
2019 jyly QR Tsıfrlyq damý, qorǵanys jáne aeroǵarysh ónerkásibi mınıstrliginiń Elektrondyq ındýstrııany damytý departamentinde «Jastar tájirıbesi» baǵdarlamasyna qatysty. 2020-2023 jyldar aralyǵynda Tsıfrlyq damý, ınnovatsııalar jáne aeroǵarysh ónerkásibi mınıstrliginiń Elektronıka ónerkásibin jáne tsıfrlyq aktıvter ındýstrııasyn damytý departamentiniń sarapshysy, bas sarapshysy, basqarma dırektory jáne dırektorynyń orynbasary qyzmetterin atqarǵan. 2023 jyldan bastap qazirgi ýaqytqa deıin ICRIAP elektrondy ındýstrııany jáne tsıfrlyq aktıvter ındýstrııasyn damytý departamentiniń dırektory boldy.
Óńirler boıynsha, Aqtaý qalasynyń ákimi qyzmetine Baıpaqov Ábilqaıyr Jańaıuly taǵaıyndaldy.
Ábilqaıyr Baıpaqov 1978 jyly Mańǵystaý oblysy Shetpe aýylynda dúnıege kelgen. Memlekettik jáne jergilikti basqarý mamandyǵy boıynsha joǵary bilimi bar. Osy jyldar ishinde oblystyń memlekettik organdarynda, onyń ishinde Mańǵystaý oblysynyń ishki saıasat basqarmasy men mádenıet basqarmasynda, Aqtaý qalasy, Túpqaraǵan jáne Qaraqııa aýdandary ákimi apparatynda, oblys ákimi apparatynda basshy, Baıandy aýylynyń ákimi, «Kaspıı» ÁKK UK» AQ dırektory, Aqtaý qalasy ákiminiń orynbasary qyzmetterin atqarǵan. 2023 jyldan búgingi kúnge deıin Mańǵystaý oblysynyń Mádenıet, arhıvter jáne qujattama basqarmasynyń basshysy boldy.
Jetisý oblysy ákiminiń ókimimen Dıas Rahmetuly Esdáýletov Jetisý oblysy ákiminiń orynbasary bolyp taǵaıyndaldy.
Dıas Rahmetuly Esdáýletov 1987 jyly Taldyqorǵan qalasynda týǵan. Joǵary bilimdi. Shanhaı Djao Tong ýnıversıtetin aqparattyq tehnologııalar jáne telekommýnıkatsııa júıeleri mamandyǵy boıynsha bitirgen. «Bolashaq» baǵdarlamasynyń túlegi. Eńbek jolyn Astana qalasynda «2011 jylǵy VII qysqy Azııa oıyndarynyń uıymdastyrý komıtetiniń atqarýshy dırektsııasy» AQ-nyń tehnıkalyq suraqtar boıynsha bas sarapshysy bolyp bastady.
Ár jyldary «Ulttyq aqparattyq tehnologııalar» AQ elektrondyq qyzmetterdi ilgeriletý departamentiniń menedjeri, «Qazkontent» AQ-da aqparattyq-taldaý ortalyǵynyń aqparattyq jobalar monıtorıngi jónindegi mamany, ortalyq basshysy, jobalardy basqarý departamentiniń dırektory, «Qazaqstan tarıhy» ınternet-jobasynyń basshysy, medıa jobalar boıynsha basqarýshy dırektor, QR Prezıdenti janyndaǵy «Ortalyq kommýnıkatsııalar qyzmeti» RMM aqparattyq josparlaý qyzmetiniń basshysy, medıa josparlaý jáne óńirlerdegi jumys basqarmasynyń basshysy bolǵan.
QR Aqparat jáne kommýnıkatsııa mınıstrliginiń Aqparat komıteti Qoǵammen baılanys ornatý jáne memlekettik organdarmen úılestirý basqarmasynyń basshysy, QR Premer-Mınıstri baspasóz qyzmetiniń bas sarapshysy, QR Premer-Mınıstri Keńsesiniń Aqparattyq-taldaý ortalyǵynyń jedel aqparat sektorynyń meńgerýshisi, ortalyq meńgerýshisiniń orynbasary, QR Prezıdentiniń Ákimshiligi Taldaý jáne boljaý ortalyǵy meńgerýshisiniń orynbasary, Almaty qalasy ákimdiginiń qoǵamdyq damý basqarmasynyń basshysy laýazymdaryn atqardy. 2022 jyldyń naýryzynan QR Prezıdenti janyndaǵy «Ortalyq kommýnıkatsııalar qyzmeti» RMM dırektorynyń orynbasary boldy.
Pavlodar oblysy ákiminiń ınvestıtsııalar jáne bıznesti damytý boıynsha orynbasary laýazymyna Qabyltaeva Áıgerim Jańbyrtaıqyzy taǵaıyndaldy.
Áıgerim Janbyrtaıqyzy 1984 jyly týǵan. «Bakalavr-hımııa» mamandyǵy boıynsha joǵary bilimi jáne ekologııa magıstri dárejesi bar. Eńbek jolyn 2007 jyly Pavlodar oblysynyń qorshaǵan ortany qorǵaý basqarmasynyń jetekshi mamany bolyp bastap, keıin oblystyq jer qoınaýyn paıdalaný, qorshaǵan orta jáne sý resýrstary departamentinde basshylyq laýazymdarda qyzmet atqardy. 2021 jyldan bastap osy laýazymǵa taǵaıyndalǵanǵa deıin Pavlodar oblysynyń jer qoınaýyn paıdalaný, qorshaǵan orta jáne sý resýrstary basqarmasynyń basshysy bolyp eńbek etti.
Pavlodar oblysy qurylys basqarmasynyń basshysy bolyp Asqar Ajmurat taǵaıyndaldy.
Asqar Qadyruly 1976 jyly týǵan, joǵary tehnıkalyq bilimi bar.1999 jyly S. Toraıǵyrov atyndaǵy Pavlodar memlekettik ýnıversıtetin «Injener-qurylysshy-tehnolog» mamandyǵy boıynsha aıaqtaǵan. Eńbek jolyn 1999 jyly Pavlodar farmatsevtıkalyq zaýytynda jabdyqtaý boıynsha menedjer bolyp bastaǵan. Odan keıin 2001-2002 jyldar aralyǵynda memlekettik emes qurylymdarda eńbek etti. 2002 jyldan 2024 jylǵa deıin Pavlodar oblysynyń jergilikti atqarýshy organdarynda túrli laýazymdarda qyzmet atqardy. Osy laýazymǵa taǵaıyndalǵanǵa deıin Pavlodar qalasynyń qurylys bóliminiń basshysy bolyp qyzmet etti.
Sondaı-aq, Pavlodar oblysy jer qoınaýyn paıdalaný, qorshaǵan orta jáne sý resýrstary basqarmasynyń basshysy bolyp Saǵyn Tóleýtaev taǵaıyndaldy.
Saǵyn Saıranuly 1988 jyly týǵan, joǵary bilimdi. 2010 jyly S. Toraıǵyrov atyndaǵy Pavlodar memlekettik ýnıversıtetin «Ekologııa» mamandyǵy boıynsha aıaqtaǵan, jaratylystaný ǵylymdarynyń magıstri dárejesi bar. 2012-2016 jyldary S. Toraıǵyrov atyndaǵy Pavlodar memlekettik ýnıversıtetiniń «Bıologııa jáne ekologııa» kafedrasynda oqytýshy boldy.
Memlekettik qyzmettegi eńbek jolyn 2016 jyly Pavlodar oblysy jer qoınaýyn paıdalaný, qorshaǵan orta jáne sý resýrstary basqarmasynyń jer qoınaýyn paıdalaný bóliminiń bas mamany bolyp bastady, odan keıin 2019-2021 jyldary osy basqarmanyń jer qoınaýyn paıdalaný bóliminiń basshysy bolyp eńbek etti. 2021 jylǵy jeltoqsannan bastap osy ýaqytqa deıin «Pavlodar oblysynyń jer qoınaýyn paıdalaný, qorshaǵan orta jáne sý resýrstary basqarmasy» MM basshysynyń orynbasary qyzmetin atqardy.