Elimizde apta ishinde bolǵan kadrlyq taǵaıyndaýlar
1 sáýirde Memleket basshysynyń Jarlyǵymen Álıhan Ashanuly Smaıylov Qazaqstan Respýblıkasy Joǵary aýdıtorlyq palatasynyń tóraǵasy laýazymyna taǵaıyndaldy.
Smaıylov Álıhan Ashanuly 1972 jyly Almaty qalasynda dúnıege kelgen.
1994 jyly ál-Farabı atyndaǵy Qazaq memlekettik ulttyq ýnıversıtetin «qoldanbaly matematıka» mamandyǵy boıynsha támamdaǵan.
1996 jyly — QR Prezıdenti janyndaǵy Qazaqstan menedjment, ekonomıka jáne boljamdaý ınstıtýtynyń memlekettik basqarý magıstri dárejesine ıe boldy.
1993–1999 jyldary — «A-Invest» ınvestıtsııalyq-jekeshelendirý qorynyń bas mamany; bólim basshysynyń orynbasary, QR Ulttyq statıstıka agenttiginiń basqarma basshysy; QR Statıstıkalyq josparlaý jáne reformalar jónindegi agenttiginiń Statıstıka jáne taldaý komıteti tóraǵasynyń orynbasary; bas sarapshy, ekonomıka sektorynyń meńgerýshisi, QR Prezıdenti Ákimshiliginiń memlekettik ınspektory bolyp qyzmet atqarǵan.
1999–2003 jyldary — QR Statıstıka agenttiginiń tóraǵasy.
2003–2006 jyldary — QR syrtqy ister vıtse-mınıstri, «Eksporttyq nesıeler men ınvestıtsııalardy saqtandyrý jónindegi memlekettik saqtandyrý kompanııasy» AQ basqarma tóraǵasy.
2006–2009 jyldary — QR qarjy vıtse-mınıstri, «QazAgro» UBH prezıdenti.
2009–2014 jyldary — QR Statıstıka agenttiginiń tóraǵasy.
2014–2015 jyldary — QR Ulttyq ekonomıka mınıstrliginiń Statıstıka jónindegi komıtetiniń tóraǵasy.
2015–2018 jyldary — QR Prezıdentiniń kómekshisi.
2018 jylǵy qyrkúıekten bastap 2019 jylǵy aqpanǵa deıin — Qarjy mınıstri.
2019 jylǵy 25 aqpanda Prezıdent Jarlyǵymen Premer-Mınıstrdiń birinshi orynbasary –
Qarjy mınıstri qyzmetine taǵaıyndaldy. 2021 jyly 18 qańtarda QR Prezıdentiniń Jarlyǵymen osy qyzmetine qaıta taǵaıyndaldy.
2022 jylǵy 11 qańtarda QR Prezıdentiniń Jarlyǵymen QR Premer-Mınıstri laýazymyna taǵaıyndaldy.
2024 jyldyń aqpanynda Prezıdent Úkimetti otstavkaǵa jiberdi.
Apta basynda Erbol Ospanov QR Densaýlyq saqtaý vıtse-mınıstri qyzmetine taǵaıyndaldy.
Erbol Ospanov 1977 jyly Ońtústik Qazaqstan oblysynda dúnıege kelgen. 1998 jyly Ál-Farabı atyndaǵy Qazaq memlekettik ulttyq ýnıversıtetin, 2002 jyly Qazaq ulttyq agrarlyq ýnıversıtetin támamdaǵan.
Eńbek jolyn 1999 jyly «Qaztemirjolkólikjobalaý» AQ-da ınjener bolyp bastady.
«Qazaqstan temir jol kóliginiń ǵylymı-zertteý ınstıtýty» JShS joba jetekshisi, «Qarjy júıesin aqparattandyrý ortalyǵy» AQ-da jetekshi ınjener-jobalaýshysy bolyp qyzmet atqardy.
Ár jyldary «Ulttyq aqparattyq tehnologııalar» AQ, «Zerde» ulttyq ınfokommýnıkatsııalyq holdıngi» AQ, QR Densaýlyq saqtaý jáne áleýmettik damý mınıstrliginde basshylyq qyzmetter atqardy.
2020 jyldan bastap qazirgi ýaqytqa deıin — QR eńbek jáne halyqty áleýmettik qorǵaý vıtse-mınıstri.
Dúısenbide QR burynǵy Ulttyq ekonomıka mınıstri Álibek Qýantyrov KazEnergy
dırektory bolyp taǵaıyndaldy.
Álibek Qýantyrov 1983 jyly Atyraý qalasynda týǵan.
Tomsk memlekettik ýnıversıtetin, Mıchıgan ýnıversıtetin bitirgen, qoldanbaly ekonomıka magıstri.
Prezıdenttik jastar kadr rezerviniń múshesi.
Eńbek jolyn 2005 jyly QR Ekonomıka jáne bıýdjettik josparlaý mınıstrliginde jetekshi mamannyń mindetin atqarýshy bolyp bastady.
2005-2010 jyldary QR Ekonomıka jáne bıýdjettik josparlaý mınıstrliginde túrli laýazymdarda jumys istedi.
2010-2013 jyldary QR Qarjy mınıstrliginiń Bıýdjettik josparlaý jáne boljamdaý departamenti dırektorynyń orynbasary boldy.
2013 jyly QR Indýstrııa jáne jańa tehnologııalar mınıstrliginiń Geologııa jáne jer qoınaýyn paıdalaný komıteti tóraǵasynyń orynbasary qyzmetin atqarǵan.
2013-2019 jyldary QR Prezıdent Ákimshiliginde túrli qyzmetter atqardy.
2019-2021 jyldary QR Tuńǵysh Prezıdenti — Elbasy Keńsesiniń Aqparattyq-saraptamalyq qamtamasyz etý bóliminiń meńgerýshisiniń orynbasary, 2021-2022 jyldary QR Ulttyq ekonomıka vıtse-mınıstri, 2022-2024 jyldary — QR Ulttyq ekonomıka mınıstri qyzmetin atqarǵan.
Aptanyń alǵashqy kúni Ábilqaıyr Ońǵar Shymkent qalalyq jaıly ortany damytý basqarmasyna basshy boldy.
Ábilqaıyr Baqytqalıuly 1994 jyly 25 shildede Ońtústik Qazaqstan oblysy, Báıdibek aýdany, Boraldaı aýylynda dúnıege kelgen.
M.Áýezov atyndaǵy Ońtústik Qazaqstan memlekettik ýnıversıtetiniń jáne KAZGıÝÝ ýnıversıtetiniń túlegi.
Mamandyǵy boıynsha biliktiligi — ekonomıka jáne bıznes, quqyqtaný.
Eńbek jolyn 2016 jyly Ońtústik Qazaqstan oblysy tabıǵat paıdalanýdy retteý basqarmasynyń ınspektory qyzmetinen bastady.
2016-2017 jyldary Ońtústik Qazaqstan oblysy energetıka jáne turǵyn úı-kommýnaldyq sharýashylyq basqarmasynyń bas mamany, 2018-2023 jyldary Shymkent qalasy Abaı aýdany ákiminiń apparaty halyqpen jumys júrgizý bóliminiń bas mamany, bólim basshysy qyzmetterin atqardy.
2023 jyldyń 13 naýryzynan bastap búgingi kúnge deıin Shymkent qalalyq jaıly ortany damytý basqarmasy basshysynyń orynbasary qyzmetin atqaryp keldi.
2 sáýir kúni Abzal Dosjanov Atyraý munaı óńdeý zaýytynyń bas dırektory boldy.
Abzal Dosjanov Atyraý qalasynda týǵan. Eńbek jolyn 2006 jyly Atyraý munaı óńdeý zaýytynda tehnologııalyq qondyrǵylardyń operatory bolyp bastaǵan. Keıin zaýytta gıdrogenızatsııalyq protsester aýysymynyń bastyǵy bolǵan.
«Frantsııanyń munaı ınstıtýtynda (IFP School) biliktiligin arttyrǵannan keıin ol Atyraý munaı óńdeý zaýytyndaǵy jumysyn kásiporyndy jańǵyrtý jobasyn súıemeldeý tobynyń tehnologııa boıynsha bas mamany qyzmetinde jalǵastyrdy. 2010 jyldan KMG International kompanııasynda Petromıdııa zaýytynyń protsesterin jaqsartý jónindegi menedjeri, dırektordyń óndiris jónindegi orynbasary, Rompetrol Petrochemicals bas dırektorynyń birinshi orynbasary, Rompetrol Rafinare operatsııalyq dırektory, Rominserv jáne Rompetrol Well Services kompanııalarynyń basshysy, Rompetrol Rafinare munaı óńdeý zaýytynda bas dırektordyń birinshi orynbasary — bas ınjener laýazymdarynda eńbek etti», — dep «QazMunaıGaz» UK AQ baspasóz qyzmeti.
2023 jyldan osy kezge deıin «QazMunaıGaz» UK AQ munaı óńdeý jáne munaı hımııasy departamenti munaı óńdeý basqarmasynyń bastyǵy qyzmetin atqarǵan.
Seısenbi kúni Jambyl oblysynyń qurylys basqarmasyna jańa basshy taǵaıyndaldy.
Jambyl oblysy ákiminiń ókimimen Orýmbaev Erlan Qurmantaıuly Jambyl oblysy ákimdiginiń qurylys basqarmasynyń basshysy bolyp taǵaıyndaldy.
Orýmbaev Erlan Qurmantaıuly 1978 jyly Jambyl oblysynyń Qordaı aýdanynda týǵan, bilimi joǵary. Joǵary oqý ornyn «ınjener-mehanık», «quqyqtaný» mamandyqtary boıynsha bitirgen.
Eńbek jolyn 2000 jyly Qordaı aýdany ákiminiń jastar isi, sport jáne týrızm basqarmasynda bas maman bolyp bastaǵan.
Ár jyldary Qordaı aýdany ákiminiń jastar isi, sport jáne týrızm basqarmasynyń bastyǵy, Qordaı aýdany ákimi apparatynyń bas ınspektory, Qordaı aýdandyq sport bóliminiń meńgerýshisi, Qordaı aýdandyq máslıhaty tekserý komıssııasynyń tóraǵasy, «Nur Otan» HDP Qordaı aýdandyq fılıaly tóraǵasynyń birinshi orynbasary, «Romaks KZ» JShS logıstıka bóliminiń mamany, bólim basshysy, Qordaı aýdany ákimi apparatynyń bas mamany, Jambyl oblysy ákimi apparatynyń uıymdastyrý-ınspektorlyq bólimindegi oblys ákiminiń bas ınspektory, Jambyl oblysy ákimi apparatynyń qarjy-ekonomıkalyq bóliminiń basshysy, Qordaı aýdany ákiminiń orynbasary, oblys ákimdiginiń qurylys basqarmasynyń basshysy, «TarazQurylysInvest» JShS-niń bas dırektorynyń orynbasary qyzmetterin atqarǵan. Qordaı aýdandyq máslıhatynyń IV shaqyrylymyndaǵy depýtaty.
2023 jylǵy mamyr aıynan bastap búgingi kúnge deıin «TarazQurylysInvest» JShS-niń bas dırektory laýazymynda qyzmet atqaryp keldi.
3 sáýirde Aıgúl Jamalova Halyqaralyq jýrnalıstıka mektebiniń dekany boldy.
Maqsut Narikbayev University Halyqaralyq jýrnalıstıka mektebiniń dekany laýazymyna Aıgúl Jamalova taǵaıyndaldy.
Maqsut Narikbayev University — halyqaralyq bilim deńgeıin usynatyn elimizdiń ýnıversıtetteri arasynda kóshbasshy bilim ordasy. Ýnıversıtet komandasyna halyqaralyq jýrnalıstıka magıstri Aıgúl Jamalova qosyldy.
Aıgúl Jamalova — medıa salada 15 jyldan astam tájirıbesi bar kásibı jýrnalıst jáne medıamenedjer. Ol bedeldi «Bolashaq» stıpendııasy arqyly Ulybrıtanııanyń Lıds ýnıversıtetiniń Halyqaralyq jýrnalıstıka magıstri dárejesine ıe boldy. Al 2021 jyldan bastap MNU-de lektor qyzmetin atqarady.
Maqsut Narikbayev University komandasyna qosylǵanǵa deıin Aıgúl Jamalova «Jetinshi arna», «Atameken Business» sııaqty Qazaqstannyń jetekshi medıakompanııalarynda basshylyq qyzmetterin atqardy. Onyń digital-strategııalaryn ázirleý jáne iske asyrý, ınternet-marketıng, ınternettegi jeke jáne korporatıvtik brendti jyljytý, sondaı-aq úsh tilde eksklıýzıvti suhbattar júrgizý jáne mátin jazý salasynda mol tájirıbesi bar.
Óz qyzmet jolynda Aıgúl Jamalova «Astana» halyqaralyq qarjy ortalyǵynda korporatıvtik kommýnıkatsııalar jónindegi dırektor laýazymyn atqardy, onda brendtiń jańartylǵan digital-strategııasyn iske asyrýmen jáne ishki kommýnıkatsııalardy qurýmen aınalysty.
Aıta keteıik, 2023 jyldyń qyrkúıek aıynda Maqsut Narikbayev University-de QR Prezıdent Teleradıokesheniniń qoldaýymen Qazaqstandaǵy alǵashqy Halyqaralyq jýrnalıstıka mektebiniń saltanatty ashylýy ótken.
Sársenbide Ermek Isabaev Abaı oblysy ákiminiń baspasóz hatshysy bolyp taǵaıyndaldy.
Ermek Erejepuly 1985 jyly 17 sáýir kúni Abaı oblysy Maqanshy aýdanynda dúnıege kelgen.
2003-2006 jyldary Semeı kópsalaly kolledji, 2011-2014 jyldary Qazaq ınnovatsııalyq-gýmanıtarlyq zań ýnıversıtetiniń (Alikhan Bokeikhan University) «Qazaq tili men ádebıeti» fakýltetin támamdaǵan.
Eńbek jolyn 2008 jyly «Baıýaqov TVK-6» telearnasynda bastap, ár jyldary «Semeı tańy» gazeti, «Semei» telearnasy, «Amanat» partııasynyń Semeı qalalyq saılaýaldy shtabynda jumys istedi.
2017 jyldyń qarasha aıynan 2024 jyldyń sáýirine deıin Semeıdegi Nazarbaev Zııatkerlik mektebiniń baspasóz hatshysy qyzmetin atqarǵan.
Qazaqstan Jýrnalıster Odaǵy men Halyqaralyq Jýrnalıster Odaǵynyń múshesi, «Aqparat salasynyń úzdigi» tósbelgisiniń ıegeri.
4 sáýirde Qazaqstannyń bokstan jastar men jasóspirimder quramasynyń bapkerleri aýysty.
QR Boks federatsııasy málim etkendeı, Qazaqstan jastar quramasynyń aǵa bapkeri qyzmetine Qaırat Sátjanov taǵaıyndaldy. Ol bul mindetti atqarǵan Ádil Basyǵaraevty almastyrdy.
Qaırat Sátjanov eńbek jolynda jasóspirimder komandasynan bólek, bas quramany da jattyqtarǵan. Onyń jetekshiligimen qazaqstandyq boksshylar Serbııada ótken álem chempıonatynda 2 altyn, 2 kúmis, 1 qola medal jeńip alǵan bolatyn.
Qyzdar komandasynda da bapkerler aýysty. Qyzdar arasyndaǵy jastar quramasyna Jangeldi Ahmetov aǵa bapker bolyp taǵaıyndaldy.
Sonymen qatar bokstan Qazaqstan jasóspirim uldar komandasyna Maqsat Ospanov, jasóspirim qyzdar komandasyna Aıbek Ábildá jetekshilik etedi.
6 sáýir kúni Abaı oblysy jumyldyrý daıarlyǵy jáne azamattyq qorǵaý basqarmasyna jańa basshy keldi.
Ersin Kádirbekuly 1985 jyly 28 jeltoqsanda dúnıege kelgen.
2009 jyly Qazaq gýmanıtarlyq-zań ýnıversıtetin «ekonomıka», 2020 jyly S. Amanjolov atyndaǵy Shyǵys Qazaqstan ýnıversıtetin «quqyqtaný» mamandyǵy boıynsha bitirgen.
Eńbek jolyn QR AShM agroónerkásiptik keshendegi memlekettik ınspektsııa komıtetiniń ShQO Tarbaǵataı aýdandyq aýmaqtyq ınspektsııasynyń kadr mamany retinde bastady.
2012 jyly QR AShM Veterınarııalyq baqylaý jáne qadaǵalaý komıtetiniń Shyǵys Qazaqstan oblystyq aýmaqtyq ınspektsııasynyń ákimshilik-quqyqtyq qamtamasyz etý jáne memlekettik satyp alý bóliminiń bas maman-zańgeri boldy.
2012-2014 Tarbaǵataı aýdany ákimi apparatynyń tótenshe jaǵdaılar jónindegi bas mamany qyzmetin atqarǵan.
2015-2020 jyldary Tarbaǵataı aýdany ákimi apparatynyń basshysy bolyp jumys istegen.
2020-2021 jyldary Tarbaǵataı aýdanynyń jumyspen qamtý jáne áleýmettik baǵdarlamalar bóliminiń basshysy bolyp eńbek etti.
Osyǵan deıin Abaı oblysy Aqsýat aýdany ákiminiń orynbasary laýazymyn atqarǵan.