Elimizde apatty oqıǵalardan baspanany mindetti saqtandyrý engizilmek
«Qazirgi ýaqytta agenttik Qazaqstan úshin apat táýekelderinen saqtandyrýdyń neǵurlym qolaıly modelin tańdaý maqsatynda memlekettik organdarmen jáne halyqaralyq sarapshylarmen birlesken jumys júrgizip jatyr. Modeldiń ártúrli nusqasy qarastyrylýda jáne qarastyrylǵan nusqalardyń biri azamattardyń atyna tirkelgen turǵyn úıdi apat táýekelderinen mindetti saqtandyrýdy engizý bolmaq», — delingen agenttiktiń resmı saýalyna bergen vedomstvo jaýabynda.
Atalǵan agenttik osy jyldyń sońyna deıin el azamattarynyń baspanasyn saqtandyrýdyń ońtaıly modelin aıqyndap almaq. Sodan keıin ony qoǵam talqysyna shyǵarýdy kózdep otyr. Aıta keterligi, 2024 jyldyń 19 tamyzyna deıingi derekke qaraǵanda, elimizdiń saqtandyrý uıymdaryna sý tasqynyna baılanysty oqıǵalardan saqtandyrý týraly 134 ótinim kelip túsken. Onyń 120-sy — jeke tulǵalardan, al 44-i — zańdy tulǵalardan
«Búginde saqtandyrý tólemderine málimdelgen jalpy soma 907 mln teńgeni quraıdy. Onyń 394,2 mln teńgesi — jeke tulǵalardar, 512,5 mln teńgesi — zańdy tulǵalardan. Qalǵan ótinimderdi saqtandyrý kompanııalary qarastyryp jatyr», — dep naqtylaıdy agenttikten.
Elimizde jyljymaıtyn múlikti saqtandyrý erikti túrde júrgizilmek. Mundaı saqtandyrý quqyǵy 24 uıymnyń 15-inde bar.
Ádette múlikti erikti saqtandyrý sharttary jer silkinisi, sý tasqyny, laı kóshkin, daýyl jáne basqa da tabıǵı tosyn jaıttardy qosa alǵandaǵy apattardan bolatyn táýekelderdi jabady. Mundaı polıstiń quny ártúrli jáne jyljymaıtyn múliktiń ornalasqan jeri, onyń quny, jabyndy mólsheri men túri jáne saqtandyrý jaǵdaıynyń tarıhy syndy kóptegen faktorǵa baılanysty bolýy múmkin.
QNRDA páterdi nemese jeke úıdi saqtandyrýdyń ortasha quny birneshe myńnan ondaǵan myń teńgege deıin bolýy múmkin ekendigin alǵa tartady. Al jalpy saqtandyrý somasyn saqtandyrý kompanııasynan anyqtaý qajet.