Elimizde aǵash kóshetteriniń jersinýin baqylaý tártibi ázirlenedi

<p>ASTANA. KAZINFORM &ndash; Premer-Mınıstr Oljas Bektenov kóshetter otyrǵyzý jáne orman sharýashylyǵyn damytýǵa qatysty mınıstrler men ákimderge birqatar mindet júktedi.</p>

«Ekologııa jáne tabıǵı resýrstardy qorǵaý mınıstrligi ákimdiktermen jáne quzyrly memlekettik organdarmen birlesip bıyl 1 jeltoqsanǵa deıin kelesi jylǵa arnalǵan kóshettermen qamtamasyz etý josparyn ázirleýi tıis. Kóshetterdiń jersiný qabiletin jetildirý úshin Ekologııa jáne tabıǵı resýrstardy qorǵaý mınıstrligi ony ósirý jáne aǵash otyrǵyzý jumystarynyń sapasyn baqylaýdy qamtamasyz etý boıynsha agrotehnıkany saqtaý tártibin ázirlesin», - dedi Oljas Bektenov Úkimet otyrysynda.

Odan bólek, Úkimet basshysy orman alqaptaryna turaqty monıtorıng, onyń ishinde ǵaryshtyq monıtorıng júrgizý kerektigin aıtty.

«Ekologııa jáne tabıǵı resýrstardy qorǵaý, Tótenshe jaǵdaılar mınıstrligi óńir ákimdikterimen birge, ásirese bıýdjetten tys qarajatty tarta otyryp, orman mekemeleri úshin qajetti jabdyqtar men tehnıka satyp alý, salany qarjylandyrý sharalaryn jalǵastyrsyn», - dedi ol.

Buǵan deıin Premer-Mınıstr elimizde aǵash otyrǵyzý jumystaryn synǵa alyp, ákimdik esepterinde kóshetterdiń jersinýi jaıly eshteńe aıtylmaıtynyn jetkizdi.

Sondaı-aq, Oljas Bektenov el aýmaǵynda 2021 jyldan beri shamamen 970 mln túp kóshet otyrǵyzylǵan, biraq, olardyń jersinýi esepke alynbaıtynyn aıtqan edi.