Qazaqstanda 9 avtokólik ótkizý pýnkti jańǵyrtylyp jatyr

<p>ASTANA. KAZINFORM - Qazaqstanda avtokólik ótkizý pýnkterin tolyqqandy jańǵyrtý jalǵasýda. Búgingi tańda jańartý Qytaı, Ózbekstan jáne Túrikmenstan shekarasyndaǵy 9 baqylaý-ótkizý pýnktine qatysty, dep habarlaıdy Úkimettiń baspasóz qyzmeti.</p>

Josparlanǵan jumystar sheńberinde ótkizý múmkindigin táýligine 6 retke deıin, orta eseppen 170-ten 960 kólikke deıin arttyrý sondaı-aq shekaradan ótý ýaqytyn 30 mınýtqa deıin qysqartý kútilip otyr. Bıyl 9 baqylaý-ótkizý pýnktin jańǵyrtý jumystaryn aıaqtaý josparlanyp otyr.

Sonymen qatar Eýrazııa ekonomıkalyq odaqtyń syrtqy shekarasy boıynsha barlyq 10 avtomobıldik shekara beketinde avtomattandyrylǵan elektrondy kezek júıesi engizildi. Ony «Qoldau.kz» platformasynda jáne «CargoRuqsat» mobıldi qosymshasy arqyly paıdalanýǵa bolady.

Júıeni engizý respýblıkalyq mańyzy bar joldar boıynda avtokólikterdiń jınalyp qalýynyń aldyn alýǵa múmkindik berdi jáne tasymaldaý protsesiniń ashyqtyǵyn qamtamasyz etti.