Elimizde 700 myńnan astam adam kúızeliste júr

<p>ASTANA. KAZINFORM &ndash; Countrycassette halyqaralyq táýelsiz ınternet jýrnalynyń málimetinshe, kúızeliske shaldyqqan qazaqstandyqtardyń úlesi - 4,4 paıyz. Bul kórsetkish boıynsha Qazaqstan 180 eldiń arasynda 93-orynǵa turaqtady.</p>

Ranking.kz taratqan málimetke súıensek, jahandyq kórsetkish aıtarlyqtaı tómen (3,9 paıyz). Belgili bolǵandaı, elimizde kúızeliske beıim azamattardyń sany 732,7 myńǵa jetip otyr. Biraq, bul – boljamdy kórsetkish.

QR Densaýlyq saqtaý mınıstrligi Respýblıkalyq psıhıkalyq densaýlyq ǵylymı-praktıkalyq ortalyǵynyń (RPDǴPO) dereginshe, 2023 jyly dınamıkalyq baqylaýdaǵy psıhıkalyq jáne minez-qulyq buzylystary bar naýqastardyń jalpy sany 198,4 myń adamnan asyp otyr.

Sońǵy bir jylda eldegi psıhıatrııalyq statsıonarlar kórsetken qyzmet kólemi 29,7% ósti. Eger 2022 jyly mundaı mamandandyrylǵan medıtsınalyq mekemeler 42,4 mlrd teńgeniń (tórt toqsandaǵy jalpy málimetter) qyzmet kórsetken bolsa, 2023 jyly bul soma 54,9 mlrd teńgeden asty.

Qazaqstanda sońǵy jyldary óz-ózine qol jumsaý jaǵdaıy is júzinde ózgergen joq. Bir jylda 3,5 myńnan 4 myńǵa deıin adam óz erkimen óz ómirin qıdy. Byltyr 12 aıda elimizde 3,7 myńǵa jýyq adam óz-ózine qol jumsaǵan. Onyń 234-i – kámeletke tolmaǵandar.

Aıta keteıik, kúızelis eń kóp taraǵan elderdiń bestiginde psıhıkalyq buzylystyń belgileri bar halyqtyń úlesi 6,3%-dy quraıtyn Ýkraına alda tur. Odan keıin AQSh, Aýstralııa jáne Estonııa jaıǵasqan. Atalǵan elderde kórsetkish 5,9 paıyzǵa teń.