Elimizde 37 myń adam jazasyn ótep jatyr

<p>ASTANA. KAZINFORM &ndash; Búginde Qazaqstan aýmaǵynda 62 jazany óteý oryndary bar. Tolyǵyraq Іshki ister mınıstrliginiń resmı ókili Shyńǵys Alekeshev aıtyp berdi.</p>

«Qylmystyq-atqarý júıesiniń negizgi mindeti – jazany óteý tártibin qamtamasyz etý, sottalǵandardyń quqyǵy men bostandyǵyn qorǵaý, olardy túzetý quraldaryn anyqtaý, sondaı-aq, jaza basqandardy áleýmettik ortaǵa qaıta beıimdeý. Qazir elimizde 78 mekeme jumys isteıdi. Onyń ishinde 62 bas bostandyǵynan aıyrý túrindegi jazany óteý oryndary jáne 16 tergeý ızolıatory. Ol jerlerde 37 myń jazasyn óteýshiler otyr, onyń 32 myńy sottalǵandar, al 5 myńy tergeý kezinde qamaýǵa alynǵan aıyptylar», - dedi Shyńǵys Alekeshev vedomstvoda ótken onlaın brıfıngide.

Resmı ókildiń málimdeýinshe, kolonııalar men ýaqytsha ustaý ızolıatorlarynda 39 myńnan astam beınekamera ornatylǵan.

«Memleket basshysy sottalǵandardyń quqyǵy men zańdy múddeleriniń buzylýyna jol bermeý jáne mekeme qyzmetkerleriniń arasyndaǵy tártipti qamtamasyz etý maqsatynda barlyq kolonııaǵa beınebaqylaý júıesin engizýdi tapsyrǵan edi», - deıdi ol.

Buǵan deıin ІІM ókili kolonııalarǵa túrli ádispen tyıym salynǵan zattardy alyp kiretini týraly aıtqan edi.