Elimizde 3 700-den astam úı sý astynda qaldy – TJM

<p>ASTANA. KAZINFORM &ndash; Qazaqstannyń 10 óńirinde ákimdikter jergilikti aýqymda 30 tótenshe jaǵdaı jarııalady. Bul týraly Tótenshe jaǵdaılar mınıstrliginiń resmı ókili Dınara Nurǵalıeva málim etti.&nbsp;</p>

«Búginde Aqtóbe, Qostanaı, Batys Qazaqstan, Abaı, Ulytaý, Aqmola, Qaraǵandy, Atyraý, Pavlodar jáne Soltústik Qazaqstan oblysynda jergilikti sıpattaǵy tótenshe jaǵdaı rejımi jarııalandy. Sý tasqyny bel alǵaly el boıynsha 72 myńnan astam adam qutqarylyp, evakýatsııalandy, onyń ishinde 17 myńnan astamy kámeletke tolmaǵan balalar. Ýaqytsha ornalastyrý pýnktterinde qazir 14 466 adam, onyń ishinde 7 269 bala bar, - dedi Dınara Nurǵalıeva Ortalyq kommýnıkatsııalar qyzmeti alańynda ótken baspasóz máslıhatynda.

Sondaı-aq mınıstrlik ókili adamdardy qutqarý áýe kemesiniń kómegimen júzege asyrylatynyn atap ótti. Osylaısha, sý tasqyny bastalǵaly 2 607 adam, onyń ishinde 760 bala evakýatsııalanǵan. 

«Qazirgi ýaqytta Aqtóbe, Qostanaı, Pavlodar, Aqmola, Atyraý jáne Soltústik Qazaqstan oblysy sý astynda qalyp otyr. Atap aıtqanda, 3 702 turǵyn úıdi sý basty», - deıdi ol. 

Aıta keteıik, búgin Atyraý oblysynda tótenshe jaǵdaı jarııalandy. 

Eske sala ketsek, elimizdiń sý basqan óńirlerde sý synamasyna zertteý júrgiziledi. 

Búgin Tótenshe jaǵdaılar mınıstrligi sý tasyǵan óńirlerde 72 029 adam qaýipsiz jerge kóshirilgenin habarlaǵan edi.