Elimizde 27 myńnan astam qutqarýshy jumys isteıdi

<p>Búgin azamattyq qorǵaý organdarynyń qurylǵanyna 28 jyl toldy. Qutqarýshylar kúni tótenshe jaǵdaılardyń aldyn alý men joıýǵa tikeleı qatysatyndardy biriktiretin jalpyhalyqtyq kúnge aınaldy. Bul týraly QR Tótenshe jaǵdaılar mınıstri Syrym Sháriphanov aıtyp berdi, dep habarlaıdy <a href="https://kaz.inform.kz/" target="_blank" rel="noopener">Kazinform.&nbsp;</a></p>

«Osy ýaqyt aralyǵynda bizdiń vedomstvo jańa syn men qaýip-qaterlerge nyq turyp keldi. Adamdardy qorǵaý jáne qutqarý isinde aıtarlyqtaı baǵa jetpes tájirıbe jınadyq. Tabıǵı jáne tehnogendik sıpattaǵy TJ aldyn alýǵa múmkindik beretin birqatar iri jobalar iske asyryldy. Atap aıtqanda, sý tasqynyna qarsy Kóksaraı jáne Astana qarsy rettegishteri, Almaty oblysynyń Talǵar, Qarǵaly ózenderinde seldi ustap turatyn bógetter salyndy. Aqsaı, Aıýsaı, Qorǵas ózenderinde 4 ınvestıtsııalyq joba iske asyrylyp jatyr. Olardy 2025 jyly aıaqtaý josparlanǵan», - dedi mınıstr Ortalyq kommýnıkatsııalar qyzmetinde ótken baspasóz máslıhatynda.

Sondaı-aq 1,5 myńǵa jýyq órt-qutqarý avtotehnıkasy satyp alynyp, 30-dan astam órt sóndirý deposy men qutqarý stantsııalary salyndy.

«Qazir azamattyq qorǵaý organdarynda 27 myńnan astam qyzmetker jumys isteıdi. Bizdiń órt sóndirýshiler, kún saıyn órtten adam ómirin saqtaý arqyly adamdardy qutqarý isine, úlken úles qosyp jatyr. Jedel-qutqarý jasaqtaryna kelsek, olar el aýmaǵynda ǵana emes, odan tys jerlerde de avarııalyq-qutqarý jáne shuǵyl jumystardy júrgizedi. Kınologııalyq bólimsheler men bizdiń qyzmettik ıtter joǵalǵan týrıster men adamdardy izdeýge qatysady», - deıdi S.Sháriphanov.

Qazaqstandyq qutqarýshylar Túrkııa men Aýǵanstandaǵy aýqymdy jer silkinisi saldaryn joıýǵa qatysty. Odan buryn 1990 jyly Zaısanda, 2003 jyly Jambyl oblysynyń Lýgovoı stantsııasyndaǵy jer silkinisteri, Qyzylorda jáne Qaraǵandy oblystaryndaǵy zymyran apattarynyń, Arys qalasy men Jambyl oblysyndaǵy oq jarylystarynyń, Maqtaaral aýdanyndaǵy sý tasqynynyń, Rıdder qalasy, Qostanaı jáne Abaı oblystarynda bolǵan orman órtin sóndirýge qatysqan.

28 jyl ishinde qutqarýshylar tótenshe jaǵdaılar men órtti joıýǵa 1,5 mıllıon ret barǵan. Olardyń kásibıligi men jedeldiginiń arqasynda 400 myńnan astam adam qutqaryldy, 380 myńǵa jýyq adam TJ túrli aımaqtarynan evakýatsııalandy, 70 myńnan astam azamatqa medıtsınalyq kómek kórsetildi.

Bıylǵy 9 aıda 9 myńǵa jýyq adam qutqaryldy. TJ aımaǵynan 9 myńnan astam adam evakýatsııalandy, zardap shekkenderge 3,5 myńnan astam alǵashqy medıtsınalyq kómek kórsetildi.