Elimizde 26,6 mln tonna astyq jınaldy - AShM

<p>ASTANA. KAZINFORM &ndash; Bıyl gektarynan 16 tsentnerden 26,6 mln tonna astyq jınaldy. Bul týraly QR Aýyl sharýashylyǵy vıtse-mınıstri Azat Sultanov málimdedi.&nbsp;</p>

«Bıyl fermerlerdiń qajyrly eńbeginiń, memlekettik qoldaý sharalarynyń jáne qolaıly aýa-raıynyń arqasynda biz gektarynan ortasha eseppen 16 tsentner ónimdilikpen 26,6 mln tonna astyq jınaı aldyq. Sondaı-aq 1,2 mln. tonnadan astam qant qyzylshasynyń rekordtyq ónimi kútilýde, bul qant ımportyna táýeldilikti aıtarlyqtaı tómendetýge jáne eldiń azyq-túlik qaýipsizdigin nyǵaıtýǵa múmkindik beredi. Aýyl sharýashylyǵy daqyldarynyń basqa túrleri boıynsha egin jınaý jalǵasýda», - dedi Azat Sultanov «Atameken» UKP XII Sezi aldyndaǵy jıynda. 

Vıtse-mınıstrdiń aıtýynsha, bıylǵy jyly eleýli memlekettik qoldaýdyń arqasynda joǵary rentabeldi daqyldardyń paıdasyna egis alqaptaryn ártaraptandyrý sátti júrgizilgen. Sonymen qatar 1,2 mln. tonnadan astam mıneraldy tyńaıtqyshtar engizilgen. Bul ótken jylǵy kórsetkishten 2 ese artyq. 

Odan bólek, elıtalyq tuqymdardyń úlesi 7,1%-dan 9,5%-ǵa deıin ósken. 

Aıta keteıik, Astanada «Atameken» QR Ulttyq kásipkerler palatasynyń XII Sezi ótti. Ortalyq memlekettik organ vıtse-mınıstrleriniń, QMA, Antıkor, Bas Prokýratýranyń basshylyq quramdary jáne «QazAgroQarjy» AQ, «Báıterek» UBH AQ, «Samuryq-Qazyna» AQ jáne basqa da jetekshi damý ınstıtýttarynyń qatysýymen ótken sharada elimizdiń túkpir-túkpirinen kelgen sharýalar ózderin tolǵandyrǵan máselesin jetkizip, sheshý joldary talqylandy.