Elimizde 2030 jylǵa qaraı jylyna 6,7 mlrd tekshe metr gaz óndiriledi

<p>Qazaqstannyń ken oryndarynan 2030 jylǵa qaraı tabıǵı gaz óndirý kólemi kúrt artady. Boljamǵa sáıkes bul kórsetkishti jylyna 6,7 mlrd tekshe metrge jetkizý josparlanǵan, dep habarlaıdy <a href="Kazinform" target="_blank" rel="noopener">Kazinform</a>.</p>

Osyǵan oraı «QazMunaıGaz» ulttyq kompanııasy Gaz strategııasyn ázirlep jatyr. Jańa strategııada «Teńiz», «Qarashyǵanaq» jáne «Qashaǵan» ken oryndaryn ıgerýdi esepke almaǵanda 2030 jylǵa qaraı tabıǵı gaz óndirisin jylyna 6,7 mlrd tekshe metrge deıin arttyrý qarastyrylyp otyr.

«2023 jyly jańa úsh ken orny ónerkásiptik paıdalanýǵa berildi. Bular – Ońtústik Aqsaı, Shyǵys Óriktaý, Rojkov ken oryndary. «QazMunaıGaz» kompanııasy aldaǵy 3-4 jylda Ortalyq Óriktaý ken ornynda óndirý jumystaryn bastaýdy josparlap otyr. Bul degenimiz – jylyna shamamen 1 mlrd tekshe metr gaz. Al, 2027 jyly Batys Prorva jáne Qalamqas ken oryndary paıdalanýǵa beriledi. Boljam boıynsha gaz óndirý kólemi jylyna 1,1 mlrd tekshe metrge deıin jetedi. Halyqaralyq kompanııalarmen birge perspektıvaly 12 geologııalyq barlaý jobasy, sondaı-aq, qoldanystaǵy ken oryndaryn jete barlaý jumystary pysyqtalyp jatyr», - dep habarlady kompanııanyń baspasóz qyzmeti.

Ótken jyly iske qosylǵan Ońtústik Aqsaı ken ornynda ıgerýge bolatyn gaz qory 1,7 mlrd tekshe metrdi quraıdy. Munda jylyna 100 mln tekshe metr gaz óndiriledi. Al, Shyǵys Óriktaý ken ornynan ıgeriletin gaz qory – 4 mln tonna. Bul ken ornynda erigen gazdyń 2,2 mlrd tekshe metr qory bar. Gazdyń aılyq óndirý kólemi – shamamen 9 mln tekshe metr.

Sondaı-aq, Rojkov ken ornynyń da qory mol. Ondaǵy ıgeriletin boljamdy gaz qory – 26,9 mlrd tekshe metr. Al, kondensattyń qory 12,5 myń tonnany qurap otyr. Ken ornynan jylyna 1 mlrd tekshe metr gaz óndirý josparlanǵan.

Eske sala ketelik buǵan deıin sońǵy úsh táýlikte elimizde qansha munaı men gaz óndirilgenin jazǵan edik.