Elimizde 2030 jylǵa qaraı munaı-gaz hımııasy ónimderi 1,8 mln tonnaǵa ulǵaıady
Energetıka mınıstrliginiń málimetinshe, shıkizatpen qamtamasyz etýden túpkilikti ónim shyǵarýǵa deıingi is-sharalardy qamtıtyn munaı-gaz hımııasy ónerkásibin damytýdyń 2024-2030 jyldarǵa arnalǵan jol kartasy ázirlengen. Qujattyń maqsaty – munaı-gaz hımııasy salasyn damytý, osy saladaǵy jobalardy iske asyrýǵa járdemdesý.
«Jol kartasynyń erejelerin oryndaý sheńberinde mynadaı nátıjeler kózdelgen. Munaı-gaz-hımııa ónimderin óndirý kólemin 2023 jylǵy 357,8 myń tonnadan 2030 jylǵa qaraı 1,8 mln tonnaǵa deıin ulǵaıady. Munaı-gaz hımııasynda iske asyrylatyn jáne jańa jobalar qajetti shıkizatpen qamtamasyz etiledi. Salaǵa 14,7 mlrd AQSh dollary somasyna ınvestıtsııa tartylyp, shamamen 3,5 myń turaqty jáne 16 myń ýaqytsha jumys ornyn qurylatyn alty joba iske asyrylady. Munaı-gaz hımııasy jobalary úshin «UIMHT» arnaıy ekonomıkalyq aımaq aýmaǵynda qajetti ınfraqurylym salynady», - dep habarlady mınıstrliktiń baspasóz qyzmeti.
Sondaı-aq, munaı-gaz-hımııa salasynyń ónimderin ótkizý naryǵy qamtamasyz etilip, ishki tutynýdy yntalandyrý kózdelip otyr. Ǵylymı bazany, adamı kapıtaldy jetildirý, sondaı-aq tıisti normatıvtik-quqyqtyq jáne tehnıkalyq qujattardy qabyldaý esebinen salany damytý úshin jaǵdaılar jasalady.
Úkimet atalǵan jol kartasyn bekitti.
Eske sala ketelik, buǵan deıin Atyraýda polıetılen shyǵaratyn alǵashqy zaýyttyń qurylysy bastalǵanyn habarlanǵan edik.