Elimizde 15 myńnan astam adam baspana kezegine jete almaı qaıtys bolǵan

<p>Ónerkásip jáne qurylys mınıstri Qanat Sharlapaev baspana kezegindegi 646 myńnyń 232 myńy nege kezekten shyǵarylatynyn túsindirdi, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Májilistiń jalpy otyrysynda zańnamaǵa turǵyn úı saıasatyn reformalaý baǵytynda engiziletin ózgeristerdi tanystyrǵan mınıstrden depýtat Marhabat Jaıymbetov 232 myń adamnyń nelikten baspana kezeginen shyǵarylatynyn surady.

«Baspana kezeginde turǵan 646 myń adamnyń 232 myńy kezekten shyǵarylady. Onyń kóbi – 90 myń adam buǵan deıin páter ıesi bolǵan. Olar zań boıynsha baspanadan úmitti bola almaıdy. Tipti bes jyldyq merzim aıasynda da olarǵa baspana berýge haqymyz joq», - dedi Qanat Sharlapaev.

Onyń sózinshe, qazirgi zańnamada baspana kezeginde zańdy turǵanyn túgendeý jylyna bir ret qana júrgiziledi.

Jańa zań boıynsha bul shara ár úsh aı saıyn jasalmaq.

«Al baspana kezegine tirkelgen óńiri turǵylyqty mekenimen sáıkespeıtin adamdardyń máselesin egjeı-tegjeıli tekserý qajet, árıne. Biz kezekti «Otbasy bankke» beremiz. Óıtkeni «Otbasy bank» 17 derekter bazasymen ıntegratsııalanǵan. Sol bazalar arqyly kezekke qoıýdyń zańdylyǵyn rastap, tekserýge múmkindik bar. Bul bizdiń aýqymdy tekserýlerimizdi aıtarlyqtaı jeńildetedi. Ár adamdy kezekten shyǵarý máselesi jeke tártippen qaralatynyn aıtqym keledi», - dedi mınıstr.

Sondaı-aq, ol 1 tamyzdan beri 21 607 adam baspana kezeginen shyǵarylǵanyn aıtty.

Mınıstrdiń depýtattar aldynda oqyǵan baıandamasyna súıensek, kezekte turǵan 646 myń adamnyń 96,1 myńynda keıingi 5 jylda baspana bolǵan.

533 adamda Qazaqstan azamattyǵy joq.

91,4 myńynyń mekenjaı tirkeýi kezekte turǵan óńirmen sáıkes kelmeıdi.

29 myń adamnyń mekenjaı tirkeýi joq bolsa, kezektegi 15,6 myń adam qaıtys bolǵan.