Elimizde 130 myń oryndyq 86 jańa mektep ashyldy

<p>ASTANA. KAZINFORM &ndash; Oqý jylynyń basynan beri óńirlerde 130 myń oqýshyǵa arnalǵan 86 mektep ashyldy, dep habarlaıdy Oqý-aǵartý mınıstrliginiń baspasóz qyzmeti.</p>

Memleket basshysynyń bastamasymen júzege asyrylyp jatqan «Jaıly mektep» ulttyq jobasy aıasynda 74,8 myń oqýshyǵa arnalǵan 27 mektep, onyń ishinde Astanada toǵyz mektep ashyldy.

Jobada bilim berý ortasynyń fýnktsıonaldyǵy men qaýipsizdigine erekshe nazar aýdarylǵan. Bastaýysh jáne joǵary synyp oqýshylary úshin bólek bloktar qarastyrylǵan. Talaptardyń qatarynda qazirgi zamanǵy tehnıkalyq quraldardy engizý arqyly qaýipsizdik sharalaryn arttyrý, erekshe bilim berý qajettilikteri bar balalar úshin kedergisiz orta qurý jáne mektepterdi zamanaýı pándik kabınettermen qamtamasyz etý bar.

Aıta keteıik, «Jaıly mektep» ulttyq jobasy aıasynda 2025 jyldyń sońyna deıin zamanaýı formattaǵy 217 mektepti paıdalanýǵa berý josparlanýda.

«Bilim berý ınfraqurylymyn qoldaý qory arqyly 18 mektep ashyldy, taǵy 41 mektep respýblıkalyq jáne jergilikti bıýdjet qarajaty, sondaı-aq ınvestıtsııalar esebinen qoldanysqa berildi»,-delingen habarlamada.

Osyǵan deıin jekemenshik mektepterge aýysatyn oqýshylar qatary artyp kele jatqany týraly jazdyq.