100-den astam sport túrine qarjy bólý qysqartylady

<p>ASTANA. KAZINFORM &ndash; Elimizde birqatar sport túrin qarjylandyrý qysqartylady. Bul týraly QR Týrızm jáne sport mınıstri Erbol Myrzabosynov málim etti.</p>

Búgin Májilistiń jalpy otyrysynda depýtat Erlan Saırov Qazaqstanda 180 túri tirkelgenin jáne onyń kóbisi jaıynda halyq habarsyz ekenin aıtty.

«Trıatl, petank, tekbol, ýnıfaıt sııaqty eshkim bilmeıtin sport túrlerin tirkep, ony bıýdjetten qarjylandyrýdyń qajeti qansha?! Máselen, Ulybrıtanııada tek qana 15 sport túri, al kórshi Ózbekstanda 17 sport túri tirkelgen, sondaı-aq Germanııada da 17 sport túri tirkeldi. Qazaqstanda 180-i tirkeýden ótken. Endi osy zań aıasynda sport túrleriniń taǵdyry qalaı bolady? Myna eshkim bilmeıtin sport túrlerine bıýdjetten aqsha bólý toqtaı ma?», - dep surady depýtat.

Óz kezeginde mınıstr keıingi kezde qoǵamda osy másele jıi kóterilip júrgenin aıtty.

Foto: Vıktor Fedıýnın/ Kazinform

«Bizdiń maqsatymyz – 180 sport túriniń ishinen basymdyq beriletin baǵyttaryn anyqtaý. Bul jumystar búgin Májiliste talqylanǵan zań jobasy aıasynda eskerilgen. Olımpıada, Paralımpıada, Sýrdlımpıada, Azııa jáne Para Azııa oıyndary baǵdarlamasyna engizilgen sport túrleri, sondaı-aq ulttyq sport túrlerin basymdyq beriletin baǵyt retinde bekitemiz. Osy oraıda 60-qa jýyq sport túri bolady. Sonymen qatar, mınıstrlik jaǵynan monıtorıng toby quryldy jáne ár óńir boıynsha tıisti taldaý jumystary atqarylyp jatyr. 60 sport túrin tek bir óńirde damytý kerek dep aıtpaımyz, ıaǵnı geografııalyq ornalasýyna, myqty jattyqtyrýshylardyń qalyptasýy jaǵdaıyna, ınfraqurylymǵa baılanysty ár óńirge basym sport túrlerin bekitemiz», - dedi mınıstr.

Budan buryn habarlanǵandaı, búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine dene shynyqtyrý jáne sport, sondaı-aq normalardyń artyq zańnamalyq reglamenttelýin boldyrmaý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy. 

Qujatta elimizdiń sport salasynda jańa irikteý júıesin engizý qarastyrylǵan. Zań jobasyna sáıkes, basym sport túrleri olardyń álemdik reıtıngteri negizinde emes, Olımpıada, Paralımpıada, Sýrdlımpıada, Azııa oıyndarynda ulttyq qurama komandalarynyń kórsetken nátıjeleri boıynsha irikteletin bolady.