Elimizde 1 shildeden bastap óndirilgen dáriler tańbalanatyn bolady

<p>ASTANA. KAZINFORM - Qazaqstanda dárilik zattardy mindetti tańbalaý 2024 jylǵy 1 shildeden bastap óndirilgen preparattarǵa ǵana engiziletin bolady. Bul týraly Úkimette vıtse-premer Serik Jumanǵarınniń tóraǵalyǵymen ótken keńeste belgili boldy.&nbsp;</p>

Tıisti ózgerister 2020 jylǵy 10 qyrkúıektegi Úkimet qaýlysyna engizilýde. Bul dárihanalar men dıstrıbıýtorlarǵa tańbalaý kodtaryn esepke alý jáne qadaǵalaý úshin aqparattyq júıelerdiń ıntegratsııasyn naqtylaýǵa múmkindik beredi.

Foto: QR Úkimeti

Densaýlyq saqtaý vıtse-mınıstri Erbol Ospanovtyń aıtýynsha, 1 maýsymdaǵy jaǵdaı boıynsha 383 kóterme qoımanyń 287-si qajetti jabdyqtarmen jabdyqtalǵan, 15 óńirde tekseris júrgizildi. Jaqyn arada qalǵan 5 óńirge shyǵý qarastyrylyp otyr.

Jalpy elimizde tsıfrlyq tańbalaýdy engizýdiń oń serpini baıqalady: Qazaqstanǵa aıaq kıimniń resmı (anyqtalǵan) ımporty 2019 jyly 39,5 mln juptan 2023 jylǵa qaraı 54,5 mln jupqa deıin ósti. Bızneske aıaq kıimniń qaldyqtaryn belgileý úshin úsh jylǵa jýyq ótpeli kezeń berildi (2021 jyldyń 1 qarashasynan 2024 jyldyń 1 maýsymyna deıin).

Sonymen qatar keden qoımalarynyń aıaq kıimdi tańbalaýǵa daıyn emestigin eskere, keńes qorytyndysy boıynsha, Ónerkásip jáne qurylys mınıstrligine ımporttaýshylardyń óz qoımalarynda aıaq kıimdi tańbalaýǵa ruqsat berý máselesin pysyqtaý tapsyryldy.

Sondaı-aq keńeste zergerlik buıymdardy tańbalaý boıynsha retteýshilik áserge taldaý júrgizý boıynsha beıindi mınıstrlikterdiń baıandamalary tyńdaldy.