«Elim dep kúı tógemin» — Elordada Nurlan Bekenovtiń shyǵarmashylyq keshi ótedi

<p>3 qarasha kúni saǵat 19:00-de Astanadaǵy E.Rahmadıev atyndaǵy memlekettik akademııalyq fılarmonııanyń kontsert zalynda kúıshi, kompozıtor, dırıjer, mádenıet qaıratkeri Nurlan Bekenovtiń &laquo;Elim dep kúı tógemin&raquo; atty shyǵarmashylyq keshi ótedi, dep habarlaıdy <a href="https://kaz.inform.kz/" target="_blank" rel="noopener">Kazinform.</a></p>

«Bıyl Astana qalasynyń 25 jyldyǵy atalyp ótti. Meniń de elordaǵa kelip, sol kezdegi mýzyka akademııasyna túsip, óner jolymdy bastaǵanyma 25 jyl toldy. Soǵan oraı halqymyzdyń rýhanı baılyǵy – kúı ónerin qurmettep, tebirene tyńdaıtyn jurtshylyqqa jańa týyndylarymdy tartý etkeli turmyn», - deıdi Nurlan Bekenov.

Kontserttiń jańalyqtary óte mol bolmaq. Jetisýdan shyqqan ataqty aǵa sultan Tezek tóreniń «Abylaıdyń aq ıyǵy» atty kúıi alǵash ret oryndalady.

Nurlan Bekenovtiń «Taýbaı tolǵaýy nemese Aqyn armany» atty kúıin qazaq orkestri oryndaıdy. Bul kúı Atyraý óńirinde qurylys salasynda eńbek etip júrse de, ómirin ónermen baılanystyryp, aqyn retinde aty shyqqan Taýbaı Saqtaǵanulyna arnalǵan. Sondaı-aq osy keshte T.Saqtaǵanulynyń sózine jazylǵan N.Bekenovtiń «Jastyq shaq qaıtyp kelmeıdi» ánin Svetlana Aıtbaeva alǵash ret kórermen nazaryna usynady.

Nurlan Bekenovtiń Qablısa jyraýǵa, Oraqty batyrǵa jáne Shyńǵys hannyń oń qoly bolǵan Muqalı batyrǵa arnalǵan kúı dastandary oryndalady.

N.Bekenovtiń «Alty Alashtyń balasy» atty jańa ánin «Baldáýren» balalar hory shyrqaıdy. Sózin jazǵan Aıbatyr Seıtaq. Budan basqa da kóptegen týyndylar bar.

Óner ujymyn sahnaǵa atalǵan qazaq orkestriniń kórkemdik jetekshisi jáne bas dırıjeri, Qazaqstannyń eńbek sińirgen qaıratkeri, professor Aıtqalı Jaıymov bastap shyǵady.

Kompozıtordyń shyǵarmashylyq keshinde Halyq ártisi Altynbek Qorazbaev, kúıshi Seken Turysbek, Qazaqstannyń eńbek sińirgen qaıratkeri Serik Erkimbekov, Táttimbet atyndaǵy akademııalyq qazaq halyq aspaptary orkestriniń bas dırıjeri Erlan Baqtygereı, ánshiler Zaǵıpa Imanǵazıeva men Gúlmıra Sarına, «Gúlmarjan» dýeti jáne basqa da daryn ıeleri óner kórsetedi dep kútilýde.