Elimniń, balalarymnyń bolashaǵy úshin daýys berdim – Olga Rypakova

ÓSKEMEN. QazAqparat – Olımpıada chempıony Olga Rypakova saılaýda óz tańdaýyn jasady, dep habarlaıdy QazAqparat tilshisi.

Olımpıada chempıony, el maqtanyshy Olga Rypakova Qazaqstanda ótip jatqan barlyq saılaýlar men referendýmdarǵa qatysyp keledi. Osylaısha ol óziniń belsendi azamattyq ustanymyn kórsetýde. Sportshy búgin ótip jatqan Parlament Májilisi men barlyq deńgeıdegi máslıhat depýtattarynyń kezekten tys saılaýynan da shet qalǵan joq.

Olga Rypakova Óskemen qalasyndaǵy №47 orta mektepte ornalasqan №2 saılaý ýchaskesinde daýys berdi.

«Bul meniń el azamaty retindegi mindetim. Elimniń, balalarymnyń bolashaǵy úshin daýys berdim. Balalarym óz Otanynda ómir súrip, osynda oqyp jáne jumys isteıtin bolady, - dedi Olımpıada chempıony.

Óz sózinde ol bıýlletenniń kóptigine qaramastan, bári qarapaıym jáne túsinikti bolǵanyn, daýys berý protsesinde eshqandaı qıyndyq týyndamaǵanyn jetkizdi.

Eske salsaq, osyǵan deıin Óskemendegi saılaý ýchaskesinen fotoreportaj bergen edik.