Elimizge keletin ózbekstandyqtardyń ýaqytsha tirkeýsiz turý merzimi uzarýy múmkin

ASTANA. QazAqparat – Qazaqstanǵa keletin Ózbekstan azamattarynyń elimizde ýaqytsha tirkeýsiz turý merzimi uzartylmaq. Bul týraly Іshki ister mınıstrligi ashyq talqyǵa shyǵarǵan kelisim qujatynda jazylǵan, dep habarlaıdy QazAqparat tilshisi.

«Eki eldiń ulttyq pasport ıeleri bolyp tabylatyn azamattary ekinshi memleketiniń aýmaǵyna 30 táýlikke deıin, ýaqytsha tirkeýsiz keledi jáne onyń aýmaǵynda bola alady. Degenmen azamattar ýákiletti organdarǵa óziniń kelgeni týraly habarlama berýi tıis.

Bolý ýaqytyn 30 táýlikten asatyn merzimge uzartýdy taraptar memleketteriniń zańdaryna sáıkes ishki ister organdary memleketten shyqpaı alty aı merzimge júzege asyrady», - dep kórsetilgen kelisim qujatynda.

Aıta ketsek, qoldanystaǵy talap boıynsha Ózbekstan azamattary Qazaqstanǵa 5 táýlikke ýaqytsha tirkeýsiz kele alady. Endi onyń merzimin 25 kúnge uzartyp, jalpy 30 táýlik etip bekitý usynylyp otyr.

Sonymen qosa, jańa ózgeristerdiń biri – buǵan deıin eki eldiń shekara qyzmetteri berip kelgen kóshi-qon baqylaý kartochkalary alynyp tastalady.

Kelisimge sáıkes, Ózbekstan azamattarynan Qazaqstan aýmaǵyna kelerde suralatyn qujattar:

- Ózbekstan Respýblıkasynyń bıometrıkalyq dıplomattyq pasporty;

- Ózbekstan Respýblıkasy azamatynyń bıometrıkalyq pasporty (shetelge shyǵý pasporty);

- Ózbekstan Respýblıkasy azamatynyń bıometrıkalyq emes úlgidegi pasporty;

- Ózbekstan Respýblıkasyna oralý úshin sertıfıkat (Ózbekstan Respýblıkasyna oralý úshin ǵana);

- Áýe kemesiniń ekıpajy múshesiniń kýáligi (ekıpajdyń quramynda júrýi kezinde);

- Úkimetaralyq feldegerlik qyzmet qyzmetkeriniń jeke kýáligi.