Elimizge keletin eńbek mıgranttaryna salyq salynatyn bolady
Mınıstr orynbasarynyń aıtýynsha, zań jobasy Eńbek jáne Salyq kodeksterine ózgerister engizýdi qarastyrady. «Atap aıtqanda, jeke tulǵalar qaramaǵynda eńbek etýge keletin sheteldik jumysshymen eńbek kelisimsharttary jasalady. Al Salyq kodeksi eńbek mıgranttaryna jeke tabys salyǵyn salý tártibin retteıtin normamen tolyǵady. Bul rette kóship-qonýshy jeke eńbek salyǵy boıynsha 2 aılyq eseptik kórsetkish mólsherinde (3 myń 236 teńge) aldyn ala tólem jasaıdy. Bul ruqsat beriletin árbir aıǵa tólenedi», - deıdi Qaırat Tynybekov.
Onyń aıtýynsha, atalǵan salyqtyq norma engizilse, bıýdjetke túsetin boljamdy qarajat jylyna 4 pen 6 mlrd. teńge shamasynda josparlanady.
«Bundaı norma elimizge vızasyz tártippen keletin TMD azamattaryna, onyń ishinde zańsyz eńbek mıgranttarynyń basym bóligin qurap otyrǵan Ortalyq Azııa óńiri elderine baǵyttalady. Al ruqsatnama 1-3 aılarǵa berilip, keıinnen uzartýǵa jatady. Al Qazaqstanda bolatyn eń joǵary merzim 1 jyl», - deıdi Q. Tynybekov. Bul rette eńbek mıgranttarymen ruqsatnama boıynsha elimizdiń jeke tulǵalarynda úı sharýashylyǵynda, qurylys jumystaryna qyzmetter kórsetý týraly eńbek kelisimsharttary jasalady.
«Zań qabyldansa, elimizdegi zańsyz eńbek mıgranttaryn zańdastyrýǵa, olardyń kelýine baqylaýdy kúsheıtýge tıimdi tetik qalyptastyrady. Ekinshiden, eńbek mıgranttarynyń salyǵy esebinen bıýdjet túsimi artady. Eńbek mıgranttarynyń qyzmeti «kóleńkeli ekonomıkadan» shyǵarylyp, sybaılas jemqorlyqtyń joly kesiledi. Eń aqyry eńbek kóshi-qony boıynsha naqty statıstıka alyp, osy rynoktyń jaǵdaıyn saraptaýǵa serpin beredi, boljam jasap, eńbek naryǵyn damytýǵa jaǵdaı jasaıdy», - deıdi Q. Tynybekov.