Elimizge keletin eńbek mıgranttaryn qadaǵalaý kúsheıedi

ASTANA. QazAqparat – 1 qarashadaǵy jaǵdaı boıynsha Qazaqstanda 14 957 sheteldik jumys istep júr. Bul týraly QR Eńbek jáne halyqty áleýmettik qorǵaý mınıstrligi kóshi-qon komıteti tóraǵasynyń mindetin atqarýshy Іlııas Ispanov aıtty, dep habarlaıdy QazAqparat tilshisi.

«Elimizde tapshy ári syrttan jıi shaqyrylatyn mamandyqtar túri boıynsha shetelden 100 úzdik mamandy tartý kózdeledi. Ózderińiz bilesizder, qazir joǵary tehnologııalardy paıdalaný arqyly dúnıe júzindegi memleketter óndiristi damytyp jatyr. Básekege qabiletti, sapaly ónim shyǵarý, elge jetkizý, shetke satý, ol úshin tehnologııamen qosa, ony biletin mamandar qajet. Ol mamandar elnge kelip, óz ujymyndaǵy jergilikti azamattardy úıretý arqyly kóptegen jumystardy alǵa jyljytýǵa bolady. Osynyń arqasynda qazaqstandyq jumysshylardyń kásibı biliktiligin kóterýge múmkindik bar», - dedi Іlııas Ispanov Ortalyq kommýnıkatsııalar qyzmetinde ótken baspasóz máslıhatynda.

Sondaı-aq, kórshi elderden, sonyń ishinde tirkeýsiz, beıresmı júrgenderdiń jumysyn retteý, olardy itrkeýge alý, baqylaý-qadaǵalaý jumystary da qolǵa alynady.

«Qazirgi ýaqytta elimizge sheteldikter vızaly jáne vızasyz elderden keledi, máselen 30 kúnge Ózbekstannan kelse, EýrazEQ elderinen 90 kúnde deıin vızasyz júrýge ruqsattary bar. Solardyń qyzmeti retke keltiriledi. Bul jerde aıta keterligi, ishki eńbek naryǵyn qorǵaý úshin elimizde kvota belgilenedi. Ol kvotaǵa baılanysty memlekette joq, tapshy mamandar qajet bolatyn jaǵdaıdy bekitemiz, sol azamattardy shetelden shaqyrýǵa múmkindik beriledi. Bul kvota byltyrǵy jylmen salystyrǵanda 7 myńǵa azaıdy, qazir 21 myń bekitilse, naqty 14 myń 900 adam shetelden kelip, ruqsat alyp jumys istep jatyr. Olar ári qaraı jumysyn atqaryp, merzimderi bitkende elden shyǵarý máselesi qaralady», - dedi spıker.

Eńbek mınıstrliginiń habarlaýynsha, eń kóp jumys isteıtinder qurylys salasynda – 5910 adam (40%), taý-ken ónerkásibi jáne karer qazý – 1 419 adam (10%), aýyl, orman jáne balyq sharýashylyǵy – 1 146 adam (8%), kásibı, ǵylymı jáne tehnıkalyq qyzmet – 1 081 adam (8%), óńdeý ónerkásibi – 995 adam (7%).

Eńbek mıgranttary keletin negizgi elder: Qytaı – 3 500 adam, Úndistan – 1 731 adam, Túrkııa – 1 642 adam, Ózbekstan – 1 344 adam, Ulybrıtanııa – 1 112 adam.

Aıta keteıik, Eńbek mınıstrligi basqa da quziretti memlekettik organdarmen birlesip, 2023-2027 jyldarǵa arnalǵan Kóshi-qon saıasaty tujyrymdamasyn ázirledi. Elimizge eń tapshy mamandyqtar boıynsha 500 myqty mamandy tartý úshin 7 baǵytta jumys júrgiziledi.