Elimizdiń úsh óńirinde tabıǵı gaz jelileri joq

ASTANA. QazAqparat – Jyl basyndaǵy derekke saı, eldegi gazdandyrý deńgeıi 59%-ǵa jetti. Bul týraly Indýstrııa jáne ınfraqurylymdyq damý mınıstrligi ashyq talqyǵa shyǵarǵan «2023-2029 jyldarǵa arnalǵan turǵyn úı-kommýnaldyq ınfraqurylymyn damytý tujyrymdamasynda» jazylǵan, dep habarlaıdy QazAqparat tilshisi.

«Bıyl 1 qańtardaǵy málimet boıynsha eldegi gazdandyrý deńgeıi 59%-ǵa jetti. Bul degenimiz 11,6 mıllıon adam tabıǵı gazǵa qol jetkizdi degendi aıǵaqtaıdy. 2021 jyly bul kórsetkish 57,67% bolǵan edi. 2017-2021 jyldar aralyǵynda 9 123,7 km gaz jelisi salyndy», - dep kórsetilgen qujatta.

Mınıstrlik usynǵan aqparatqa saı, qazirgi kezde elimizdiń negizinen batys jáne ońtústik óńirleri men Qostanaı oblysynyń turǵyndary ǵana gazben tolyq qamtylǵan.

«Gaz jelisine Astana qalasyn, Aqmola jáne Qaraǵandy oblystaryn qosý úshin jumystar júrgizilip jatyr. Bul 2030 jylǵa qaraı osy óńirlerdiń úı sharýashylyqtaryna kómirden tabıǵı gazǵa kóshýge múmkindik beredi. Gaz jelilerine Soltústik Qazaqstan, Shyǵys Qazaqstan jáne Pavlodar oblystary qol jetkize almaı otyr. Olar jetildirilgen kómir qazandyqtaryn paıdalanýyn jalǵastyrady», - delingen tujyrymdamada.

Qujatty ashyq talqylaý 15 naýryzǵa deıin jalǵasady.