Elimizdiń ýnıversıtet júıesin túbegeıli retteıtin ýaqyt keldi - Aqylbek Kúrishbaev
«Birinshiden, Nazarbaev ýnıversıtetiniń úlgisi boıynsha otandyq joǵary oqý oryndaryn tolyqqandy avtonomdy basqarýǵa kóshirý jónindegi bastalǵan reformalardyń aıaqtalýyn tezirek qamtamasyz etý kerek. Ekinshiden, ýnıversıtetterdi zertteý baǵytyndaǵy joǵary oqý oryndaryna aınaldyrý úshin memlekettik qoldaýdyń júıeli sharalary qajet. Bul rette AQSh, Germanııa, Qytaı, Reseı jáne taǵyda basqa memleketterdiń úlgisinde otandyq ýnıversıtetterdiń ǵylymı - tehnıkalyq áleýetin damytýdyń arnaıy baǵdarlamasyn qabyldaý óte mańyzdy», - dedi Senator.
Úshinshiden, onyń atap ótýinshe, úzdik álemdik tájirıbege sáıkes, ýnıversıtetter zamanaýı basqarý júıesine aýysýy kerek.
«Atap aıtqanda, joǵary oqý oryndaryndaǵy Ǵylymı keńestiń alqaly basqarý organy retindegi ókilettigin zańnamalyq turǵydan naqtylaý qajet. Rektor tek ashyq konkýrs negizinde taǵaıyndalýy tıis. Sonymen qatar, bizdiń rektorlarymyz sheteldik jetekshi ýnıversıtetterdegideı belgili bir merzimge ǵana saılanyp, aýysyp turýy kerek. Bul joǵary oqý ornynyń serpindi damýyn qamtamasyz etedi jáne jas kadrlardyń básekelestigine jol ashady»,- dedi ol.
Bilim jáne ǵylym mınıstrliginiń málimetine súıengen senator 2019 jyly mamandardy daıyndaý baǵyttary boıynsha memlekettik bilim berý grantynda oqyǵan ýnıversıtet túlekteriniń tek 40-74 paıyzy ǵana jumysqa ornalasqan.
«Onyń ózinde olar óz mamandyǵyna sáıkes jumysqa ornalasty ma joq pa, belgisiz. Eger jaǵdaı ózgermese biz jylda bıýdjet qarajatynyń kem degende 10 mlrd teńgesin tıimsiz jumsap otyramyz. Bul dáıekter elimizdiń joǵary bilim salasyndaǵy eleýli kemshilikterdiń betin ashyp otyr. Bul másele tek jeke menshik ýnıversıtetterdi jabýmen sheshilmeıdi. Jalpy elimizdiń ýnıversıtettik júıesin túbegeıli retteıtin ýaqyt keldi», - dedi Aqylbek Kúrishbaev.