Elimizdiń tórt óńirinde muǵalimderdiń jalaqysy eki ese ósedi

NUR-SULTAN. QazAqparat – QR Bilim jáne ǵylym mınıstrliginiń Mektepke deıingi jáne orta bilim komıtetiniń tóraǵasy Gúlmıra Kárimova elimizdiń qaı óńirlerindegi muǵalimder joǵary jalaqy alatynyn aıtty, dep habarlaıdy QazAqparat tilshisi.

Onyń aıtýynsha, Memleket basshysy bergen tapsyrmaǵa sáıkes muǵalimder tapshylyǵy baıqalǵan óńirlerge úzdik pedagogterdi tartýdyń tıisti qoldaý sharalarynyń paketi bar arnaýly baǵdarlama jobasy ázirlendi.

«Arnaıy baǵdarlama jobasyn ázirleý aıasynda óńirlerdegi pedagogterdiń tapshylyǵyn anyqtaý boıynsha taldaý júrgizildi. Máselen, pedagogterdiń tapshylyǵy Atyraý, Mańǵystaý, Almaty jáne Túrkistan oblystarynda saqtalyp otyr. Ulttyq statıstıka jáne halyqaralyq salystyrmaly zertteýler derekteri birqatar jyldar ishinde nysanaly óńirlerdegi bilim alýshylardyń bilim sapasynyń eldegi ortasha kórsetkishterden artta qalǵanyn kórsetedi. Muny PISA-2018 halyqaralyq zertteýiniń nátıjeleri jáne Ulttyq biryńǵaı testileýdiń nátıjeleri rastaıdy», - dedi G. Kárimova Ortalyq kommýnıkatsııalar qyzmetinde.

Baǵdarlama pedagogterge respýblıkalyq bıýdjettiń nysanaly transfertteri esebinen laýazymdyq jalaqydan 100% mólsherinde yntalandyrýshy qosymsha aqy berýdi kózdeıdi. Atap aıtqanda, olardyń eńbekaqysy eki ese ósedi.

JOO pedagogteri men túlekterin bos laýazymdarǵa tartý úshin Baǵdarlama aıasynda nysanaly óńirlerdiń oblystyq bilim basqarmalary janynan Úılestirý keńesteri, sondaı-aq Mınıstrlik janyndaǵy Konkýrstyq komıssııa qurylady.

Konkýrs jylyna eki ret ótkiziledi jáne konkýrstyń kelesi kezeńderi belgilendi: konkýrs ótkizý týraly habarlandyrý, úmitkerlerdiń qujattaryn qabyldaý, kompıýterlik testileý jáne esse jazý, qashyqtyq formatta áńgimelesý. Konkýrs barysynda barlyq úmitkerler turǵylyqty jerine qaramastan teń quqyly, úmitkerler arasynda adal básekelestik jáne ótkizýdiń obektıvtiligi, ashyqtyǵy, jarııalylyǵy qamtamasyz etiledi.

«Konkýrsqa tıisti beıinder boıynsha joǵary pedagogıkalyq, joǵary kásiptik bilimi bar, onyń ishinde turǵylyqty jerine qaramastan joǵary oqý oryndarynyń pedagogıkalyq mamandyqtarynyń túlekteri, sondaı-aq barlyq qajetti qujattardy kórsetilgen merzimde jáne tolyq kólemde usynǵan pedagogter qatysa alady», - dedi komıtet basshysy.

Іriktelgen pedagogter úshin 4 aptalyq biliktilikti arttyrý kýrstary jáne onlaın-jáne oflaın formattarda semınarlar, vebınarlar men sheberlik synyptary, 8 Zııatkerlik mekteptiń zerthanalary bazasynda Jaratylystaný pánderi muǵalimderiniń taǵylymdamalary uıymdastyrylatyn bolady.