Elimizdiń syrtqy saıasaty men ulttyq qaýipsizdigi senimdi qolda - Jeńisbek Máýlenqulov

TÚRKІSTAN. QazAqparat - Túrkistan oblystyq ardagerler keńesiniń tóraǵasy Jeńisbek Máýlenqulov jańadan taǵaıyndalǵan el Prezıdentiniń durys baǵyt-baǵdar ustanyp otyrǵanyn aıtady. Memleket basshysynyń ant berý jáne ulyqtaý rásimine qatysqan zeınetker elimizdiń syrtqy saıasaty men ulttyq qaýipsizdigi naǵyz mamannyń senimdi qolyna tıgenin alǵa tartady, dep habarlaıdy QazAqparat tilshisi.

«Memleketimizdiń jańa basshysy - tekti áýletten shyqqan, qazaqy tárbıe alǵan, birneshe til biletin, tereń bilimi bar naǵyz ıntellektýal azamat. Sonymen qatar, ol - Qazaqstannyń syrtqy saıasattaǵy strategııalyq áriptesteriniń barlyǵymen qoıan qoltyq jumys istep, olardy ishinen tanyǵan kórnekti dıplomat. Máselen, ol Máskeýde bilim alsa, Qytaıdaǵy KSRO elshiliginde jumys istegen. Qala berdi BUU tóraǵasynyń orynbasary bolǵan jyldary Batys álemimen de etene tanysýǵa múmkindigi boldy. Bir aýyz sózben aıtqanda, elimizdiń syrtqy saıasaty men ulttyq qaýipsizdiginde jańashyldyq pen turaqtylyq bolady»,- deıdi ardagerler keńesiniń tóraǵasy.

Zeınetkerdiń aıtýynsha, Memleket basshysy ınaýgýratsııa rásiminde sóılegen sózinde mańyzdy baǵyttarǵa toqtalyp, el arasynda jarqyn bolashaqqa senim arttyrdy.

«Prezıdent mańyzdy baǵyttardyń biri retinde jańa jumys oryndaryn ashý men halyqty laıyqty jalaqymen qamtý ekenin atap ótti. «Ulttyq tabysty ádil bólý máselesi - bul strategııalyq mańyzdy dúnıe. Memlekettik bıýdjettiń qarajatyn eń aldymen keleshegi zor maqsattarǵa jáne jańa jumys oryndaryn ashýǵa bólý qajet» dedi. Demek, jaqyn keleshekte halyqtyń turmys jaǵdaıy da kúrt jaqsaryp, qoǵamda áleýmettik ádilettilik ornaıdy degen sóz»,- deıdi Jeńsbek Máýlenqulov.