Elimizdiń syndarly saıasatyn jalǵastyratyn salıqaly basshy kerek – depýtat
«Nur Otan» partııasynyń Tóraǵasy Nursultan Nazarbaev partııanyń Ortalyq apparatynda bolǵan qurylymdyq fılıaldar jetekshilerimen kezdesýinde kezekten tys Prezıdent saılaýy bıliktiń zańdylyǵyn nyǵaıtyp, elimizdegi turaqtylyqty qamtamasyz etý úshin qajet dep málimdedi.
«Aldaǵy saılaýǵa óz úmitkerimizdi usyný úshin partııa sezin ótkizý kerek. Partııa Apparaty sezd daıyndyǵyna qajetti barlyq jumysty tez arada qolǵa alýy tıis», - degen Elbasy, saılaýdy elimizdiń zańnamasy jáne barlyq demokratııalyq normalary men qaǵıdattaryna saı ótkizý qajettigine erekshe nazar aýdardy.
«Shyndyǵyna kelsek, tarıhtyń san qatparly jolynan ótken elimiz úshin táýelsizdiktiń alǵashqy on jyly ońaı bolǵan joq. El halqyna on saýsaqtyń salasyndaı, bir ananyń balasyndaı tatýlyq pen birlik, shydamdylyq pen tózimdilik kerek boldy. Ol úshin eldi sońyna erte biletin, aqyldy, bilgir, kóregen saıasatker, basshy bolatyn azamat kerek edi. Táýelsiz elin 30 jylǵa jýyq basqarǵan Elbasymyz óz ókilettiligin toqtatqan kezde «Endi qalaı bolar eken?» dep eldiń kókeıinde saýal bolǵanyn nesine jasyraıyq. Baǵytymyz ben maqsatymyz aıqyndalǵan, álemge tanylǵan jas memlekettiń irgesin shaıqaltpaı, shańyraǵyn bıik ustaıtyn salıqaly basshy kerek ekenin rasymen de sezine bastadyq. Sondyqtan, aldaǵy belgilengen saılaýda zaıyrly memlekettiń zań talaptaryna saı keletin sarabdal kóshbasshysy keledi degen úmitim zor», - dedi F.Merhamıtqyzy.
«Nur Otan» partııasynyń Almaty qalalyq máslıhatyndaǵy depýtattyq fraktsııasynyń múshesi osy jaýapty iste halyqty birlikke, yntymaqqa shaqyra otyryp, uıymshyldyqpen saılaýǵa qatysýǵa shaqyrdy.
Eske sala ketsek, aǵymdaǵy jyldyń 9 maýsymynda elimizde kezekten tys prezıdenttik saılaý ótedi.
Foto: www.altyn-orda.kz