Elimizdiń ońtústiginde dızel otyny qymbattady

ShYMKENT. QazAqparat - Túrkistan oblysynda dızel otyny qymbat baǵada satylýda. Buǵan deıin 176-178 teńgeden satylǵan janar-jaǵarmaıdyń quny qazir 180-183 teńgege kóterildi, dep habarlaıdy QazAqparat tilshisi.

Baǵa ásirese kishigirim janar-jaǵarmaı beketterinde sharyqtap tur. Óńirdegi  «Janar-jaǵar maı qaýymdastyǵynyń» tóraǵasy Qaıypbek Qambarovtyń  aıtýyna qaraǵanda, baǵanyń kúrt ósýine  egin naýqanyndaǵy suranystyń artýy sebep bolǵan.

Sondaı-aq beketterge bólinetin dızel otynynyń kólemi de azaıyp otyr. Máselen, aımaqta jazdaǵy aýyl sharýashylyǵy jumystaryna 24 myń 700 tonna dızel otyny bólingen bolsa, áli de suıyq otynǵa degen suranys joǵary bolýda. Qosymsha  Aýyl sharýashylyǵy mınıstrilginiń arnaıy baǵdarlamasymen bólinýi tıis  13 myń tonna dızel otyny aıdyń sońyna qaraı jetkiziledi dep josparlanǵan.

«Dızel otyny 4-5 teńgege qymbattaǵan. Sebebi, qajettilikti qamtamasyz etetin 10-12 myń tonna jetpeı tur.  Endi jetkizilip jatyr. Sońǵy 4-5 kúnde jetip qalýy tıis. Baǵa negizinen shaǵyn beketterde qymbattaǵan. Al, iri janarmaı quıý beketterinde baǵa sol kúıinde tur»,- deıdi oblystyq «Janar-jaǵarmaı qaýymdastyǵynyń» tóraǵasy Qaıypbek Qambarov.

Sondyqtan jergilikti sharýalar áli de kóterilgen baǵamen alýǵa májbúr. Óıtkeni aýyldyq jerlerde iri kompanııalardyń beketteri joqtyń qasy.