Elimizdiń ońtústiginde bıyl sý tapshylyǵy bolýy múmkin

NUR-SULTAN. QazAqparat – Bıyl elimizdiń ońtústigi men ońtústik-shyǵysyndaǵy taýly ózenderdiń kópshiliginde sý az bolady. Bul týraly búgin Úkimet otyrysynda QR Ekologııa, geologııa jáne tabıǵı resýrstar mınıstri Maǵzum Myrzaǵalıev aıtty, dep habarlaıdy QazAqparat tilshisi.

«Respýblıkanyń taýly aımaqtarynda qar qory boıynsha jaǵdaı kelesideı: Shyǵys Qazaqstan oblysynyń Buqtyrma sý qoımasy aýmaǵynda qar qory jyldyq ortasha mánderden 26 paıyzdan 49 paıyzǵa deıin tómen. Ertis ózeniniń sol jaq salasynda atalǵan kórsetkish ortasha kópjyldyq mánderdiń sheginde», - dedi ol.

Onyń dereginshe, Jambyl jáne Túrkistan oblystarynyń taýlarynda qar qory ortasha kópjyldyq mánderden 40 paıyzdan 82 paıyzǵa deıin, al Almaty oblysynyń taýlarynda 25 paıyzdan 56 paıyzǵa deıin az.

«Sonymen qatar, kórshiles Ózbekstan men Qyrǵyzstan aýmaǵynda qar qory ortasha kópjyldyq mánderden 30 paıyzdan 60 paıyzǵa deıin az ekenin aıta ketý kerek. Bul degenimiz, elimizdiń ońtústigi men ońtústik-shyǵysyndaǵy taýly ózenderdiń kópshiliginde bıylǵy jyly sý az bolady dep boljanady», - dedi mınıstr.