Elimizdiń munaı óńdeý zaýyttarynda otyn jóneltý jalǵasýda – QazMunaıGaz
Munaıdy bastapqy óńdeýden ótkizetin ELOÝ-AT-2 qondyrǵysy jumysyn jalǵastyryp jatyr. Óıtkeni bul qondyrǵy kásiporynnyń jylý elektr ortalyǵyndaǵy ishki generatsııa esebinen elektr energııasymen qamtamasyz etilgen, dep habarlaıdy QazAqparat tilshisi «QazMunaıGaz» kompanııasynyń baspasóz qyzmetine silteme jasap.
AMÓZ-de munaı ónimderin óndirý syrtqy jeliler tarapynan elektr energııasyn berý jumystaryn turaqtandyrǵannan jáne tehnologııalyq qondyrǵylardy turaqty rejımge shyǵarǵannan keıin qaıta bastalady. Elektr energııasyn berý qaıta bastalǵannan keıin birden munaı ónimderin tıeý zaýyttyń rezervýarlarynda bar qorlar esebinen júrgiziletin bolady. Qazir avtobenzınniń 26 000 tonna, dızel otynynyń 33 000 tonna, suıytylǵan munaı gazynyń (TMD) 1 200 tonna qory bar. Bul 7 kúnde tıep-jóneltiledi», -dep habarlady kompanııanyń baspasóz qyzmeti.
Kompanııanyń málimetinshe, Atyraý MÓZ-diń qysqa merzimge toqtaýy naryqtyq jaǵdaıǵa keri áserin tıgizbeıdi. Óıtkeni, elimizde AI-92 benzıni men dızel otynynyń aǵymdaǵy qory bir aılyq tutyný kólemin, AI-95 qory eki aptalyq kólemin quraıdy.
«Pavlodar munaı-hımııa zaýyty josparly jóndeýge toqtatylǵanyn, al, Shymkent MÓZ rıformıng qondyrǵysyndaǵy ishinara jumystar úshin toqtatylǵanymen, kásiporyndardan munaı ónimderin jóneltý toqtatylmaıdy», -dep málim etti kompanııadan.
Sondaı-aq, Astana ýaqytymen saǵat 18:29-da MAEK-tiń 1-shi energııa blogyndaǵy apattyq ajyratylýǵa baılanysty «KUS» JShS-niń generatsııalaý qondyrǵylary apattyq jaǵdaıda toqtatylǵan. Sol sebepten, «KPI inc» JShS-da elektr energııasy tolyq ajyratylǵan.
Eske sala ketelik, budan buryn Energetıka mınıstrligi elimizde janar-jaǵarmaıdyń jetkilikti qory baryn málim etken edi.