Elimizdiń kóshi-qon zańnamasyn buzǵan Úndistannyń úsh azamaty elden shyǵaryldy
Jyl basynan beri kólik polıtseıleri Qazaqstannyń kóshi-qon zańnamasyn buzǵany úshin 121 azamatty, onyń ishinde 86 sheteldikti Qazaqstan aýmaǵynda bolý erejelerin buzǵany úshin ákimshilik jaýapqa tartty.
Bul týraly kóliktegi polıtsııa departamenti bastyǵynyń birinshi orynbasary Madııar Aıtýǵanov aıtty.
Onyń sózinshe, Almaty qalasynyń áýejaıyndaǵy jelilik polıtsııa bóliminiń qyzmetkerleri reıdtik is-sharalar júrgizý kezinde QR kóshi-qon zańnamasyn buzǵan 19, 21 jáne 32 jastaǵy Úndistan azamattaryn anyqtady.
Olar zańnamada belgilengen merzim ótkennen keıin on táýlikten astam ýaqyt ishinde elden ketý týraly talapty oryndamaǵan.
– Kólik polıtseıleri sheteldikterge qatysty QR ÁQBtK-niń 517-babynyń 4-bóligi (Sheteldiktiń nemese azamattyǵy joq adamnyń Qazaqstan Respýblıkasynyń halyqtyń kóshi-qony salasyndaǵy zańnamasyn buzýy) boıynsha ákimshilik hattama toltyrdy. Dál osyndaı quqyqbuzýshylyq Shý stantsııasynda Kókshetaý–Qyzylorda baǵytyndaǵy jolaýshylar poıyzyn tekserý kezinde de anyqtaldy. Bul joly Tájikstan Respýblıkasynyń 28 jastaǵy azamatyna qatysty QR ÁQBtK-niń 517-baby 4-bóligi (Sheteldiktiń nemese azamattyǵy joq adamnyń Qazaqstan Respýblıkasynyń halyqtyń kóshi-qony salasyndaǵy zańnamasyn buzýy) boıynsha ákimshilik materıal toltyryldy. Sondaı-aq ákimshilik quqyq buzýshylyqtar jónindegi sottyń sheshimimen joǵaryda atalǵan quqyqbuzýshylar QR aýmaǵyna kirýge 5 jyl merzimge tyıym salý belgilenip, Qazaqstan Respýblıkasynan tys jerlerge shyǵaryp jiberý túrinde jaýapqa tartyldy, – dep sózin túıindedi Madııar Aıtýǵanov.
Foto: polisia.kz