Elimizdiń qorǵanys salasynyń birqatar ofıtserleri jaýyngerlik týmen qoshtasty

NUR-SUTAN. QazAqparat - Qorǵanys mınıstrliginde qorǵanys vedomstvosy basshylyǵynyń qatysýymen áskerı týmen qoshtasý saltanatty rásimi ótti, dep habarlaıdy QazAqparat QR Qorǵanys mınıstrliginiń baspasóz qyzmetine silteme jasap.

Qazaqstan Qarýly Kúshteriniń birqatar ofıtserlerin zapasqa shyǵaryp saldy.

Jaýyngerlik týmen qoshtasý-árbir áskerı qyzmetshi úshin erekshe rásim. Ofıtserler kezekpen armııanyń abyroıyn, jaýyngerlik dástúrlerin beıneleıtin jaýyngerlik týdyń aldynda bas ıdi.

Qurmetti qaraýyl rotasy men tý ustaýshy tobynyń qatysýymen general-leıtenant Murat Maıkeevti, general-maıor Vasılıı Rysbaevti, polkovnıkter Raýshanbek Ábildaev jáne Bolat Qaraqkýchýkovty zapasqa shyǵarý týraly buıryq oqyldy.

Saltanatty is-shara barysynda ofıtserlerdiń áskerı joly, olardyń basshy men komandır retinde qalyptasýy, sondaı-aq elimizdiń Qarýly Kúshterindegi jetistikteri týraly derekti fılm kórsetildi.

General-leıtenant Murat Maıkeev Almaty joǵary jalpy áskerı komandalyq ýchılışesin, Frýnze atyndaǵy Áskerı akademııany bitirgen. Áskerı qyzmetin Germanııadaǵy Keńes áskerleri tobynyń ásker quramynda bastady, Baıkal áskerı okrýginde qyzmet etti, 68-shi motoatqyshtar dıvızııasy komandıriniń orynbasary boldy, Qurlyq áskerleriniń motoatqyshtar dıvızııasyn, Aeroutqyr áskerlerin, Qazaqstan qurlyq áskerlerin basqardy. 2016 jyldan bastap Maıkeev Qorǵanys mınıstriniń birinshi orynbasary - QR QK Bas shtabynyń bastyǵy qyzmetin atqardy.

General-maıor Vasılıı Rysbaev Almaty joǵary jalpy áskerı komandalyq ýchılışesin jáne Frýnze atyndaǵy Áskerı akademııany bitirgen. Ol Máskeý jáne Qıyr Shyǵys áskerı okrýgterinde qyzmet atqardy. Táýelsiz Qazaqstan Qarýly Kúshteriniń qurylýy kezinde ofıtser Otarda, Shymkentte, Almatyda, Úsharalda, Aıagóz qalasynda shtab bastyǵy jáne áskerı bólimderdiń komandıri bolyp qyzmet etti. Aeroutqyr áskerleri qolbasshysynyń orynbasary, «Astana» jáne «Shyǵys» óńirlik qolbasshylyqtarynyń qolbasshysy, Qurlyq áskerleri bas qolbasshysynyń orynbasary qyzmeti jumystaryn atqardy.

Polkovnık Raýshanbek Ábildaev Sývorov áskerı ýchılışesin, Almaty joǵary jalpy áskerı komandalyq ýchılışesin jáne QR Qarýly Kúshteriniń akademııasyn bitirgen. Germanııadaǵy Keńes áskerleri tobynyń quramynda, Frýnze atyndaǵy Kıev joǵary jalpy áskerı komandalyq ýchılışesinde qyzmet etti.

Baýyrjan Momyshuly atyndaǵy respýblıkalyq áskerı mektebinde jáne QR QM Kadrlar departamentinde kadrlyq máselelermen aınalysty. Sonymen qatar, ol áskerı polıtsııa organdary men aýmaqtyq qorǵanys áskerleriniń qurylýy, bilim berý máselelerimen aınalysty. 2017 jyldan bastap QR QM Ákimshilik departamentin basqardy.

Polkovnık Bolat Qaraquqtyqov Qazaqstan Qarýly Kúshterinde áskerı polıtsııa bólimshelerinde, anyqtaý bóliminiń aǵa anyqtaýshy-ınspektordan jáne jedel-izdestirý jumystary bólimshesiniń ınspektory laýazymdarynan bastap, QR QK Áskerı polıtsııa bas basqarmasy bastyǵynyń orynbasaryna deıin qyzmet atqardy. 2016 jyldan bastap ofıtser QR QM Zań departamentin basqardy.