Elimizdiń kóptegen óńirine jańa JEO salý qajet – Bolat Aqsholaqov

ASTANA. QazAqparat – Elimizdiń kóptegen óńirine jańadan jylý elektr ortalyǵyn salý qajet. Bul týraly QR Energetıka mınıstri Bolat Aqsholaqov aıtty, dep habarlaıdy QazAqparat tilshisi.

«Shyǵys pen Soltústikti gazdandyrý qajettigin joqqa shyǵara almaımyz. Barlyǵy birden, bir sátte jasala salmaıtyny túsinikti. Keıbir óńirge jeke ádister qajet bolady. Máselen, Rıdderge qatysty, eger qazandyqty aýystyrý kerek bolsa, onda ony jasaýǵa týra keler. Sonymen qatar otynnyń qandaı da bir jańa túrin, aıtalyq gaz qoldaný múmkindigi bolsa, kómirmen isteıtin jańa qazandyq salýdyń qajeti shamaly. Munyń bári de eskeriletindigi sózsiz», - dedi mınıstr Senattyń jalpy otyrysynan keıin BAQ ókilderiniń saýalyna oraı.

Sonymen qatar ol tilshilerdiń Rıdderde jańa jylý elektr ortalyǵyn salý múmkindigine qatysty saýalyna jaýap berdi.

«Esepteý qajet. Bul jaı ǵana jylýmen jáne elektr energııasymen qamtamasyz etý emes qoı. Tarıfi de bar. Mundaı qajettilik kóptegen óńirde bar. Olarda eskirgen stansalardy, tozǵan jelilerdi aýystyrý qajet», - dedi Bolat Aqsholaqov.