Elimizdiń Qarýly Kúshterinde aýqymdy daıyndyq sharalary bastaldy

ASTANA. QazAqparat - Qazaqstannyń Qarýly Kúshterinde ekıpajdardyń, eseptoptardyń, bólimshelerdiń daıarlyǵy bastaý aldy. Jaýyngerlik arnalymǵa sáıkes urystyń tyń jaǵdaılarynda jaýyngerlik is-qımyldardy júrgizýge áskerı qyzmetshilerdiń udaıy ázirligin qamtamasyz etýge baǵyttalǵan is-sharalar aǵymdaǵy jylǵy qańtardyń 4-i men 20-y aralyǵynda ótedi.

Atalmysh daıyndyq lezde birneshe maqsatqa qol jetkizýge múmkindik beredi. Sonyń ishinde, ekıpajdardyń, eseptoptardyń, bólimshelerdiń úılesýi men dalalyq, áýe jáne teńiz mashyǵyn jetildirý, jeke quramnyń qarý-jaraq pen áskerı tehnıkanyń jańa úlgilerin meńgerýi, qaýipsizdik talaptaryna sáıkes oǵan tehnıkalyq qyzmet kórsetý jáne jaýyngerlik qoldanýǵa ázirlikte ustap turýǵa bilim men daǵdyny arttyrý.

 

Odan basqa, sabaqtar jeke quramnyń joǵary psıhologııalyq turaqtylyǵy men dene tózimdiligin, tártibi men jaýapkershiligin shyńdaýǵa, jalpy áskerı urys qıyndyqtary men kúrdeli jaǵdaılardaǵy júktemelerdi eńserýge septigin tıgizedi.

 

Qarýly Kúshterde ekıpajdardy, eseptoptardy, bólimshelerdi daıyndaý aldynda qazaqstandyq armııada jańa 2017 oqý jyly bastalysymen mamandyqtar boıynsha áskerı qyzmetshilerdiń jeke dara daıarlyǵy bolyp ótkenin aıta ketken jón.