Elimizdiń ekologııa mınıstrligi jańa Ekologııalyq kodeks daıyndap jatyr
«Qazir jańa Ekologııalyq kodeksti ázirlep jatyrmyz. Jyl sońynda qujat Parlamentke túsedi jáne ony talqylaýdy bastaımyz. Jasyl qarjy men taza tehnologııalardy jappaı qoldaný úshin Ekologııalyq kodekske «jasyl qarjylandyrý», «jasyl jobalar» uǵymdary engizilgen. Sonymen birge, «jasyl oblıgatsııalar», nesıeler syndy jasyl qarjy túrleri qarastyrylǵan», - dedi Maǵzum Myrzaǵalıev elordada jasyl ósim týraly ІІ forýmda.
Onyń aıtýynsha, Qazaqstan jasyl qarjy tartý boıynsha Eýropalyq qaıta qurý jáne damý banki, Azııalyq damý banki, Dúnıejúzilik bank, Jahandyq ekologııalyq qor, Jasyl klımattyq qor syndy uıymdarmen yntymaqtastyqty jalǵastyrady.
«Halyqaralyq tájirıbe kórsetkendeı, ekologııalyq jáne klımattyq máselelerdi sheshýge qarajat salý turaqty damýdyń mańyzdy quraýshysy bolyp sanalady. «Jasyl qarjylandyrý» - «jasyl ekonomıka» damýyndaǵy negizgi basymdyq. Qazaqstan jańa tehnologııalyq sheshimder izdep, ınvestıtsııalar tartýǵa múddeli», - dedi mınıstr.
Aıta keteıik, 10-11 qyrkúıekte elordada «Astana» halyqaralyq qarjy ortalyǵynyń Jasyl ósimge arnalǵan ІІ forýmy ótedi. Oǵan 300-den astam álemdik jáne otandyq sarapshylar, jasyl qarjy mamandary, bıznes pen memlekettik sektor ókilderi qatysýda.
Jasyl qarjy - aýanyń lastanýyn tómendetýge, sý, energııa men jylýdy tutynýdy azaıtý syndy baǵyttaǵy jobalardy damytýǵa kómektesetin qarjylyq resýrstar. Termın qorshaǵan ortany saqtaý ıdeıasyna negizdeledi. Qazaqstan - postkeńestik elder arasynda jasyl ekonomıkaǵa kóshken alǵashqy memleket.