Elimizdiń daryndy oqýshylary Mustafa Shoqaı ómirin zertteý úshin Qyzylordaǵa keldi

QYZYLORDA. QazAqparat-Qyzylorda oblysynyń tarıhy, mádenıeti, ekonomıkalyq jáne áleýmettik damýy barysymen tanysyp, álem tanyǵan tulǵa - Mustafa Shoqaıdyń ómiri men qyzmetin zertteý maqsatynda Syr óńirine "Týǵan elge taǵzym" ólketanýlyq zertteý ekspedıtsııasymen Almaty men Shymkent qalalaryndaǵy Nazarbaev Zııatkerlik mektepteriniń  bir top oqýshysy keldi. Bul týraly «QazAqparat» tilshisi habarlady.

         Ekspedıtsııa barysynda jas jetkinshekter Alashtyń zııalysy Mustafa Shoqaıdyń týǵan ólkesine baryp, onyń ómirimen jan-jaqty tanysa alady.

        Sonymen birge Alash orda tarıhyn zertteýshilermen tildesip, óz zertteý jumystaryna qajetti aqparat ala alady. Sondaı-aq oqýshylar Qazaq handyǵynyń alǵashqy astanasy - Syǵanaq qalashyǵyna baryp, onyń Qazaqstan tarıhynda alar ornyn zerttemek.

       Baǵdarlamaǵa sáıkes jas óreńder "Saýysqandyq" shatqalyndaǵy jartasty beınelerdi de kórip, Qorqyt ata eskertkishimen tanysady dep josparlanýda.