Elimizdiń birqatar polıtsııa basshylary jemqorlyq kúdigine ilindi
Aǵymdaǵy jyldyń 8 qazanynda Sybaılas jemqorlyqqa qarsy qyzmet Almaty oblysynyń Polıtsııa departamentiniń Qaýipsizdik qyzmeti basqarmasymen (QQB) birlesip birqatar polıtsııa qyzmetkerleriniń, sonyń ishinde basshylyq quramnyń sybaılas jemqorlyq quqyq buzýshylyqtar jasaý faktilerin anyqtady.
«Polıtsııa maıory, Almaty oblysynyń PD Eńbekshiqazaq aýdanynyń polıtsııa basqarmasy bastyǵynyń mindetin atqarýshyǵa, aǵa leıtenant, Almaty qalasynyń PD Túrksib aýdandyq polıtsııa basqarmasynyń ýchaskelik ınspektoryna qatysty azamatty aldaý jáne senimin teris paıdalaný arqyly kúdiktiniń isin neǵurlym jeńil sanatqa qaıta saralaý jeleýimen 1 250 000 teńge somasyndaǵy qarajatyn ıemdengeni úshin Almaty qalasynda sotqa deıingi tergeý bastaldy»,- delingen habarlamada.
PB bastyǵynyń mindetin atqarýshy ustalyp, Almaty qalasynyń PD-niń ýaqytsha tergeý ızolıatoryna qamaldy.
Almaty oblysynda osyǵan uqsas qylmys jasaý kúdigi boıynsha Qarasaı aýdany polıtsııa basqarmasynyń tergeýshisi áshkerelendi.
Ol azamatty aldaý jáne senimin teris paıdalaný arqyly basqa tergeýshiniń óndirisindegi qylmystyq is boıynsha bas bostandyǵyn shekteýmen baılanysty jazany qoldanbas úshin 2,5 mln teńgege jýyq qarajatty ıemdengendi dep kúdiktelýde.
Atalǵan faktiler boıynsha tergeý jalǵasýda.
Kúdiktilerge qatysty túpkilikti sheshimdi olardyń kinálarynyń deńgeıin anyqtaý arqyly sot qabyldaıdy.
Sondaı-aq, Aqmola oblysynda Atbasar aýdandyq sotynyń úkimimen aǵa leıtenat, aýdandyq polıtsııa bóliminiń tergeýshisi N.E.Turǵabul qylmystyq isti toqtatý úshin azamattan 150 000 teńge somasynda para alǵany úshin aıypty dep tanyldy.
«Turǵabulǵa ómir boıy memlekettik qyzmette laýazym ıelený quqyǵynan jáne arnaıy sheninen aıyrýmen 4 500 000 teńge mólsherinde aıyppul tóleý jazasy taǵaıyndaldy», - deıdi agenttik.