Elimizdiń birqatar óńirinde oqýshylar saraıy salynady

NUR-SULTAN. QazAqparat - Kókshetaý jáne Qaraǵandy qalalarynda eki oqýshylar saraıynyń qurylysy júrip jatyr. Bul týraly QR Bilim jáne ǵylym mınıstri Ashat Aımaǵambetov aıtty, dep habarlaıdy QazAqparat.

«Ótken jyly mektepten tys uıymdardy jappaı ońtaılandyrý toqtatylǵanyn atap ótkim keledi. Bul da balalardyń qosymsha bilim alýǵa teń qol jetkizýin qamtamasyz etýge oń áser etedi. Sonymen qatar, sońǵy eki jylda Taldyqorǵan jáne Petropavl qalalarynda oqýshylar saraılary ashyldy. Bıyl Atyraý jáne Túrkistan qalalarynda oqýshylar saraılary salyndy. Túrkistan oblysynda balalar mýzyka mektebi, Óskemen qalasynda «SMART» kreatıvti bilim berý ortalyǵy ashyldy», - dep jazdy mınıstr Facebook paraqshasynda .

Sonymen qatar mınıstr qazir Kókshetaý jáne Qaraǵandy qalalarynda eki oqýshylar saraıynyń qurylysy júrip jatqanyn aıtty.

«Almaty qalasyndaǵy oqýshylar saraıynda qaıta jóndeý jumystary júrgizilmek jáne Jambyl oblysynda oqýshylar saraıynyń qurylysy josparlanǵan. Pedagog mártebesi týraly zańǵa sáıkes qosymsha bilim berý qyzmetkerleriniń de eńbekaqysy jyl saıyn ósetin bolady, sanattar úshin qosymsha aqylary ulǵaıtylady. Sondyqtan qosymsha bilim berýdi damytýdyń jańa kezeńi bastaldy dep senimmen aıta alamyn», - dedi Ashat Aımaǵambetov.

Buǵan deıin Bilim mınıstri balalardyń memlekettik tapsyrys arqyly jekemenshik uıymdarda da qosymsha bilim alýyna jaǵdaı jasalatyndyǵyn aıtqan edi.