Elimizdiń birqatar qalasynda ınklıýzııany qoldaý kabınetteri ashylady
Bul bastamany partııanyń qoldaýymen «Bolashaq» korporatıvti qory júzege asyryp keledi. Basty maqsat – aýtızm jáne basqa da mentaldy aýytqýshylyqtarǵa shaldyqqan balalardyń úıden emes, balabaqsha, mektep sııaqty bilim oshaqtarynda oqýyna jáne qurby-qurdastarymen qatar júrip, ortaǵa beıimdelýine jaǵdaı jasaý.
«Ár bala mektepke barýǵa laıyq» jobasy aıasynda 2015 jyldan beri elimizde 36 osyndaı kabınet ashylyp, jumys istep tur. Jaqyn ýaqytta «Nur Otan»-nyń qoldaýymen «Bolashaq» qory birneshe qalada taǵy 7 kabınet ashpaq.
Degenmen, «Bolashaq» KQ Qamqorshylar keńesiniń tóraıymy Dınara Shaıjúnisovanyń aıtýynsha, bul bastama barlyq óńirde birdeı qoldaý taýyp otyrǵan joq. Máselen, Aqtóbe qalasynda eki kabınet ashý úshin qor barlyq kerek-jaraqty satyp alyp, daıyndap qoıǵan. Alaıda áli kúnge deıin mektepter qajetti jóndeý jumystaryn júrgizbeı, áleýmettik pedagog, psıholog jáne defektolog mamandaryn bólmeı otyr. Baýyrjan Baıbek bul máseleni jeke baqylaýyna alatynyn aıtyp, partııa tarapynan qoldaý bolatynyn jetkizdi.
«Qazirgi tańda elimizde bilim berýde erekshe qajettilikti talap etetin 150 myńnan astam bala bar. Olardyń árqaısysyn áleýmettik ortaǵa beıimdep, qoǵamnyń tolyqqandy múshesi bolýyna kómektesý – bizdiń ortaq mindetimiz. Elbasy, partııa Tóraǵasy Nursultan Ábishuly Nazarbaevtyń tapsyrmasymen «Kedergisiz keleshek» partııalyq jobasy júzege asyrylyp keledi. Osy joba aıasynda máslıhattardaǵy «Nur Otan» fraktsııasy arqyly erekshe qajettilikterdi talap etetin balalarmen jumys isteıtin tárbıeshilerge qosymsha qarajat bólýdi qamtamasyz etýdi usyndym», – dep jazdy Baýyrjan Baıbek Instagram-daǵy paraqshasynda.