Elimizdiń belsendi jastary jańa nusqadaǵy álipbıge kóshýdi qoldap otyr

ASTANA. QazAqparat - Qazaqstannyń eń belsendi jastary latyn grafıkasyndaǵy qazaq álipbıine kóshýdi qoldap otyr. «Qazaqstan stýdentteri alıansy» RSQ qoǵamdyq birlestiginiń prezıdenti Іlııas Tústikbaev osylaı málim etti, dep habarlaıdy QazAqparat.

Onyń aıtýynsha, bala kezinen aǵylshyn tilin úırenip, áripterin bilgen jastarǵa latyn grafıkasy negizindegi qazaq álipbıin meńgerý qıynǵa soqpaıdy.

«Elbasy aıtqandaı, búgingi stýdentter - bolashaq elıta. Osy oraıda, elimizdiń damýyna óz úlesimizdi qosyp jatqanymyzǵa qýanyshtymyz. Bala kezinen aǵylshyn tilin úırenip, áripterin jatqa bilgen stýdentter úshin latyn grafıkasyn úırený qıynǵa soqpaıdy jáne olar latynǵa kóshýde belsendilik tanytady. Bilim salasyna tyń ózgerister engiziletinine, aqparattyq tehnologııalar zamanynda oqýdyń jeńildeıtinine qýanyp otyrmyz», - dedi Іlııas Tústikbaev.